फरार कैदी र लुटिएका हतियार फिर्ता ल्याउन विशेष ‘अपरेशन’ चलाइनेछ : गृहमन्त्री

काठमाडौं । गृहमन्त्री ओमप्रकाश अर्यालले जेनजी आन्दोलनको क्रममा गएको भदौ २४ गते देशका बिभिन्न कारागारमा आगजनी गरी भागेका कैदीबन्दीलाई नियन्त्रणमा लिन र लुटिएका हतियार फिर्ता लिन विशेष अपरेसन चलाउने बताएका छन् ।

उनले लुटिएका हतियार फिर्ता गर्न र भागेका कैदीबन्दीलाई कारागारमा फर्कन पटक–पटक गरेको आग्रहलाई अटेर गरिएकाले अब सरकार कठोर रूपमा प्रस्तुत हुने बताएका हुन् ।

शनिबार काठमाडौंमा उद्योग बाणिज्य महासंघद्वारा आयोजित ‘राष्ट्रिय बृहत आर्थिक बहस २.०’ लाई सम्बोधन गर्दै मन्त्री अर्यालले उक्त अपरेशन सफल बनाउन नागरिकस्तरबाट पनि सहयोगको अपेक्षा गरिएको सुनाए ।

गृहमन्त्री अर्यालका अनुसार आन्दोलनका क्रममा १४ हजार ५४९ कैदीबन्दी फरार भएकोमा हालसम्म ९ हजार ५२१ जना (६५ प्रतिशत) फिर्ता भइसकेको बताए । उनले ५ हजार १०५ जना (३५ प्रतिशत) अझै फरार रहेको उनले जानकारी दिएका छन् ।

‘कैदीबन्दीहरु अहिलेसम्म ६५ प्रतिशत फिर्ता भइसकेको र अझै अझै ३५ प्रतिशत बाहिरै छन्,’ मन्त्री अर्यालले भने–‘हतियार र कैदीहरूलाई फिर्ता गर्न हामीले पटक–पटक सूचना निकाल्यौं, तर अझै धेरै बाहिर हुनुहुन्छ । अब उनीहरुलाई फिर्ता ल्याउन विशेष अपरेशन चलाउँछौं ।’

आन्दोलनका क्रममा लुटिएका ७१० वटा हतियार फिर्ता भइसकेको र केही जलेको अवस्थामा भेटिएको बताउँदै उनले बाँकी हतियार फिर्ता ल्याउनु चुनौतीपूर्ण रहेको बताएका छन् ।