मन्त्री छान्न अनलाइन भोटिङ, मन्त्रीको सूचीमा को को छन् ?

काठमाडौं । अन्तरिम सरकारकी प्रधानमन्त्री सुशीला कार्कीले भर्चुअल भोटिङमार्फत् मन्त्री छनो गरी आजै मन्त्रिपरिषद् विस्तार गर्ने तयारी गरेकी छन् ।

शुक्रबार राति प्रधानमन्त्रीको शपथग्रहण गरेकी कार्कीले आवश्यक छलफलपछि प्रारम्भिक चरणमा सानो आकारको मन्त्रिपरिषद् बनाउने तयारी गरेकी हुन् ।

जेनजी पुस्ताको भोटिङमार्फत् प्रधानमन्त्री बनेकी कार्कीले मन्त्री छनोट प्रक्रियामा पनि उही अभ्यास गर्ने तयारी भइरहेको बुझिएको छ । राजनीतिक दलका सिफारिसभन्दा बाहिरका व्यक्तिलाई मन्त्री बनाउने चर्चा चुलिएको छ ।

मन्त्रीका लागि ऊर्जा क्षेत्रका प्राविधिक विज्ञ कुलमान घिसिङ र संवैधानिक कानुनविद् ओमप्रकाश अर्यालका नाम चर्चामा आएका छन् । नेपाली सेनाका पूर्वजर्नेल बालानन्द शर्मा पनि मन्त्रीको सूचीमा चर्चामा छन् ।

काठमाडौंका मेयर बालेन साहका सल्लाहकार तथा जेनजीले वार्तामा खटाएका कानुन ब्यवसायी ओमप्रकाश अर्याल भने मन्त्री बन्ने लगभग निश्चित छ । जेन–जी समूहले शनिबार बिहानैदेखि मन्त्रीको छनोटका लागि भोटिङ गरिरहेका छन् । दुर्गा प्रसाईंले पनि आफ्नोतर्फबाट मन्त्रीमा २ वटा कोटा मागेका छन् ।

जेनजीले भने भोटिङ प्रक्रियाबाटै आएकालाई मन्त्री बनाउन सिफारिस गरेका छन् ।

आइतबारै प्रारम्भिक स्वरूपमा मन्त्रिपरिषद् विस्तार हुने अपेक्षा गरिएको छ । साथै प्रधानमन्त्री कार्कीले आजै पदभार ग्रहण गर्दै छिन् ।