संसद जलिरहँदा ‘तेरो देश जल्यो हेर’ भन्दै अपशब्द प्रयोग गर्ने अमनप्रतापको सामाजिक संजालमा चर्को बिरोध

काठमाडौं । भदौ २४ गतेको जेनजी प्रदर्शनमा राष्ट्रिय सम्पत्ति सिंहदरबार, संंघीय संसद भवन, सर्वोच्च अदालतमा तोडफोड र आगजनी गर्नेमा कलाकारहरुसमेत अग्रपंक्तिमा रहेको खुलिरहेको छ ।

पंचायतकालमा राजाको समर्थनमा कविता लेख्ने साहित्यकार क्षेत्रप्रताप अधिकारीका छोरा अमनप्रताप अधिकारीले भदौ २४ गते संघीय संसद भवनमा आगो लगाएको र नेताहरुलाई गाली गर्दै ‘तेरो देश सकियो’ भनेर सुन्न पनि नसकिने अपशब्द प्रयोग गरेको भिडियो सामाजिक संजाल टिकटकमा पोष्ट गरेका थिए । जुन भिडियो जेनजी प्रदर्शनको डेढ महिना पुग्नै लाग्दा सार्वजनिक भएको छ ।

‘कृपा अनपल्कड शो’का परिकल्पनाकार, रोडिज, को बन्छ करोडपति, ऐना लगायतका कार्यक्रमका निर्देशक अधिकारीले संसद भवन जल्दा खुसी मनाउँदा एउटा नेपालीले तेरो देश जल्यो भन्न सक्छ र भन्ने प्रश्न उठेको छ ।

अधिकारीले टिकटकमा संसदमा आगो लगाएको र खुसी प्रकट गर्दै अपशब्द प्रयोग गरेको भिडियो सामाजिक संजालबाट हटाएका छैनन् ।

जेनजी प्रदर्शनमा राष्ट्रिय सम्पदा, देशको मुख्य प्रशासनिक अड्डा जलाउँदा र ब्यापारीक प्रतिष्ठान, होटल जलाउँदा खुसी हुनेमा अन्य  कलाकारसमेत देखिएका छन् । कलाकार दीपकराज गिरी कांग्रेस नेता तथा पूर्वगृहमन्त्री विमलेन्द्र निधिको घर जलाउन पुगेको तस्वीर सार्वजनिक भएको छ । त्यसो त कलाक्षेत्रकै निश्चल बस्नेतले संसद भवन जल्दा खुसी ब्यक्त गर्दै भिडियो बनाएर सेयर गरेकोमा पनि आमनागरिकले रुचाएका छैनन् । सिंहदरबार जलाइरहेको भिडियोमा संगीतकार चेतन सापकोटासमेत देखिएका थिए ।