अल्पमतमा परेपछि ओलीले गरे सचिवालय बैठक स्थगित, केन्द्रीय कमिटीमा फेस गर्ने

काठमाडौं । नेकपा (एमाले)अध्यक्ष केपी शर्मा ओलीले केन्द्रीय सचिवालयको जारी बैठक स्थगित गरेका छन् । सचिवालयमा अल्पमतमा परेपछि ओलीले अस्वस्थ भएको भन्दै सचिवालय बैठक स्थगित गरेका छन् ।

शुक्रबारदेखि बसेको सचिवालय बैठकमा बोल्ने वरिष्ठ उपाध्यक्ष ईश्वर पोखरेल, उपाध्यक्षहरू अष्टलक्ष्मी शाक्य, युवराज ज्ञवाली, विष्णुप्रसाद पौडेल, सुरेन्द्र पाण्डे, रामबहादुर थापा ‘बादल’ले पार्टी पुनर्गठनको माग गरेपछि शनिबारको बैठक नै स्थगित गरिएको छ । शुक्रबारको बैठकमा ८ पदाधिकारीले आ–आफ्नो धारणा राखेका थिए । बैठकमा महासचिव शंकर पोखरेल र उपमहासचिव प्रदिप ज्ञवालीले संकटको समयमा नेतृत्वको प्रतिरक्षा गर्नुपर्ने बताएका थिए ।

१९ सदस्यीय सचिवालयमा ओलीबाहेक उनको पक्षमा ४ जनामात्र देखिएका छन् । बाँकी १४ जना सचिवालय सदस्यहरु पार्टी पुनर्गठनको पक्षमा रहेको बताइन्छ । महासचिव शंकर पोखरेल, सुवास नेम्वाङको निधनपछि मनोनीत गरिएका उपाध्यक्ष गुरुप्रसाद बराल, उपमहासचिवद्वय प्रदीपकुमार ज्ञवाली र बिष्णु रिमालले मात्र उनको पक्षमा देखिएका छन् । अर्का उपमहासचिव पृथ्वी सुब्बा गुरुङ पनि पार्टी पुनर्गठनको पक्षमा पुगेका छन् ।

शुक्रबार बोलेका उपाध्यक्षहरुले खरो रुपमा पुनर्गठनको पक्षमा बोलेपछि ओली अल्पमतमा परेका थिए । सचिवालयमा अल्पमतमा परेपछि उनले अस्वस्थताको बहाना बनाएर शनिबारको बैठक नै स्थगित गरेका छन् । सचिवालयमा प्रतिवेदन नै पेश नगरी उनी केन्द्रीय कमिटी बैठक बोलाउने निष्कर्षमा पुगेका छन् । केन्द्रीय कमिटीमा बहुमत देखाउने र नेतृत्व नछाड्ने योजनाका साथ ओली लागेका छन् ।

एमाले–माओवादी एकतापछि ९ सदस्यीय सचिवालयमा अल्पमतमा पर्दा पनि ओलीले कुर्सी भाँच्छु तर नेतृत्व छाड्दिनँ भन्दै अन्ततः पार्टी नै बिभाजित हुन पुगेको थियो ।