भिजिट भिसा प्रकरण : अख्तियारका डीआईजी श्रेष्ठको सरुवा तीन घन्टामै बदर

काठमाडौं । नेपाल प्रहरीले शुक्रबार गरेको डीआईजी सरुवामा बेथिति देखिएको छ । शुक्रबार दिउँसो एसएसपीबाट बढुवा भएका ११ जना डीआईजीलाई गृह मन्त्रालयले पदस्थापन गरेको थियो । पदस्थापनमा डीआईजी ओमबहादुर रानालाई अख्तियार दुरुपयोग अनुसन्धानमा खटाइएको थियो ।

अख्तियारमा कार्यरत डीआईजी हिमालय श्रेष्ठलाई उपत्यका प्रहरी कार्यालय रानीपोखरीमा सरुवा गरिएको थियो । भिजिट भिसा प्रकरणको अनुसन्धान गरिरहेका डीआईजी श्रेष्ठलाई गृहमन्त्री रमेश लेखकको दबाबमा सरुवा गरिएको समाचार भाइरल भयो ।

साँझ गृहमन्त्रीकै निर्देशनमा श्रेष्ठलाई अख्तियारमै थमौती गरी रानालाई उपत्यका प्रहरी कार्यालयमा पदस्थापन गरियो । रानाको पदस्थापन ३ घन्टामै संशोधन गर्न गृहमन्त्रालय बाध्य भएको थियो ।
अख्तियारका प्रमुख आयुक्त प्रेमकुमार राईसँग सहमति लिएरै गृहले रानालाई अख्तियारमा पदस्थापन गरेको थियो ।