चार घन्टादेखि छलफलमा सभामुख, गृहमन्त्रीको राजीनामाको अडानबाट बिपक्षी टसको मस नहुने

काठमाडौं । भिजिट भिसा प्रकरणमा गृहमन्त्री रमेश लेखकले राजीनामा नदिएसम्म संसद चल्न नदिने अडान बिपक्षी दलहरुले राखेपछि सभामुखले बोलाएको छलफल निष्कर्षबिहीन भएको छ ।

भिजिट भिसामा दैनिक सयौं नेपालीलाई अरब मुलकदेखि यूरोपमा पठाउने क्रममा दैनिक पचासौं लाख घुस असुली हुने गरेको र त्यसमा गृहमन्त्री मुछिएकाले उनको राजीनामालाई नै विपक्षी पार्टीहरुले बटमलाइन बनाएर संसद चल्न नदिएपछि सभामुखले आधा घन्टा स्थगित गरी छलफल राखेका थिए । तर छलफलमा विपक्षीहरुले गृहमन्त्रीको राजीनामा नआएसम्म संसद चल्न नसक्ने धारणा राखेका थिए ।

मंगलबार ११ बजे सुरु हुने भनिएको बैठक केही ढिला सुरु त भयो तर लेखकले बोल्न भने पाएनन् ।

लेखकको राजनीमाको माग गर्दै प्रमुख प्रतिपक्षी दल नेकपा माओवादी केन्द्र, रास्वपा, राप्रपालगायतका दलले संसद अबरुद्ध गरेपछि सभामुख देवराज घिमिरेले आधा घण्टाका लागि भन्दै बैठक स्थगित गरेका थिए ।

नेपाली कांग्रेस र नेकपा एमालेले बैठकमा आफ्ना धारणा राख्न उपस्थित भएका गृहमन्त्री रमेश लेखकलाई रोक्न नहुने अडान कायमै राखेका छन् ।