गभर्नर नियुक्ति गर्न सरकार असफल भएकै हो ?

काठमाडौं । नेपाल राष्ट्रबैंकको गभर्नर नियुक्ति गर्न सरकार असफल देखिएको छ । नेपाली कांग्रेस–एमालेको दुईतिहाई सरकारले राष्ट्रबैंकको गभर्नर रिक्त भएको ४ दिन बितिसक्दा पनि नियुक्ति गर्न सकेको छैन । सत्तारुढ दलका दुई शीर्षनेता कांग्रेस सभापति शेरबहादुर देउवा र प्रधानन्त्री केपी शर्मा ओलीबीचमै सहमति हुन नसकेपछि गभर्नर नियुक्ति सोमबारको मन्त्रिपरिषद बैठकले समेत गर्न सकेन ।

गभर्नर नियुक्तिमा बिचौलियाकोे चलखेल यतिसम्म बढेको छ कि कांग्रेस र एमालेबीच नै खटपट निम्तिएका समाचार आइरहेका छन् । कांग्रेस सभापति देउवा र प्रधानमन्त्री ओली बिचौलियाकै सेटिङमा राष्ट्रबैंक बाहिरका वा उमेरले ६५ बर्ष नेटो काटिसकेका पूर्वमुख्यसचिव राजेन्द्रकिशोर क्षेत्री वा रविन्द्र पाण्डेलाई नियुक्ति गर्ने दाउमा थिए । तर चौतर्फी बिरोध भएपछि उनीहरु राष्ट्रबैंकभित्रैका उच्च कर्मचारीमध्येबाट बनाउनुपर्ने बाध्यतामा पुगेको बताइन्छ । प्रधानमन्त्री ओली आफ्नै गृहजिल्ला झापाकी निलम ढुंगाना तिम्सिनालाई बनाउने पक्षमा पुगेका छन् भने देउवा गुणाकर भट्टलाई बनाउनुपर्ने अडानमा छन् ।

राष्ट्रबैंकको गभर्नर नियुक्ति गर्न प्रधानमन्त्री ओली र अर्थमन्त्री बिष्णु पौडेल असफल भएको टिप्पणी पूर्वअर्थमन्त्री तथा राप्रपाका नेता डा. प्रकाशचन्द्र लोहनीले गरेका छन् । उनी सामाजिक संजालमा लेख्छन्–‘नेपालका अर्थमन्त्री कानुन बमोजिम राष्ट्र बैंकको गभर्नर नियुक्त गर्न असफल भइसके । अर्थमन्त्री ऐन बिपरीत काम गर्नु आफ्नो बहादुरी सम्झेर पदमै बसिरहेका छन् ।

आफैंले आफ्नो पक्का मान्छे भनेर नियुक्त गरेका उपकुलपति केशरजंग बरालले त्रिभुवन विश्वविद्यालयको उपकुलपतिबाट राजिनामा दिनुभयो । निष्पक्ष काम गर्न उनलाई दिइन ।
प्रधानमन्त्री अब के गर्ने भनेर निर्णय गर्न सक्तैनन् । क्षमता र ‘अग्रगमन’ को यो भन्दा ठूलो उदाहरण के होला ?’