मन्त्रिपरिषद पुनर्गठन गर्दै प्रधानमन्त्री ओली, हटाउने सूचीमा एमालेका चार मन्त्री

काठमाडौं । केपी शर्मा ओली नेतृत्वको सरकार गठन भएको ४ महिना पुग्दैछ । ४ महिना नपुग्दै प्रधानमन्त्री ओलीले मन्त्रीपरिषद पुनर्गठनको तयारी गरेका छन् । कार्यसम्पादन क्षमता देखाउन नसकेकाले एमालेका केही मन्त्रीहरुलाई पदमुक्त गर्ने तयारीमा प्रधानमन्त्री रहेको एमालेकै एक स्थायी समिति सदस्यले बताएका छन् । उनले भने–‘चार जना मन्त्रीलाई पदमुक्त गर्ने र केही मन्त्रीको जिम्मेवारी हेरफेर गर्ने तयारीमा प्रधानमन्त्री हुनुहुन्छ ।’

सरुवामा खुलेआम आर्थिक लेनेदन गरेको ब्यापक गुनासो आएपछि संघीय मामिला तथा सामान्य प्रशासन मन्त्री राजकुमार गुप्ता, भूमिब्यवस्था, सहकारी तथा गरिबी निवारण मन्त्री बलराम अधिकारीलाई पदमुक्त गर्ने सूचीमा रहेको बालुवाटार स्रोत बताउँछ ।

स्रोतका अनुसार भौतिक पूर्वाधार तथा यातायात मन्त्री देवेन्द्र दाहाल पनि पदमुक्त हुने सूचीमा रहेका छन् । बाढीपहिरो जाँदा सडक खुलाउनेदेखि सडकका खाल्डाखुल्डीको मर्मत गर्ने कुरामा नेतृत्व क्षमता देखाउन नसकेकोमा भौतिक पूर्वाधार मन्त्री पनि पदमुक्त हुने सूचीमा परेका हुन् ।

तीन महिनापछि थप एक महिनाको समय कार्यक्षमता देखाउन प्रधानमन्त्री ओलीले मौका दिएका थिए । तर देखाउन नसकेपछि चार मन्त्रीलाई पदमुक्त गर्ने निष्कर्षमा ओली पुगेका हुन् ।

अघिल्लो एमाले–माओवादी सरकारमा मन्त्री रहेकाले उद्योग, बाणिज्य तथा आपूर्ति मन्त्री दामोदर भण्डारी पनि पदमुक्त हुने स्रोत बताउँछ । भूमिब्यवस्था मन्त्री अधिकारी अघिल्लो एमाले–माओवादी सरकारमा पनि सोही मन्त्रालयमा थिए । प्रचण्ड सरकारमा मन्त्री रहेका पदम गिरी, राजेन्द्र राई, भगवती चौधरी, हरि उप्रेती, ज्वालाकुमारी साहहरु नदोहोरिए पनि उद्योगमन्त्री दामोदर भण्डारी र भूमिब्यवस्था मन्त्री बलराम अधिकारीलाई भने प्रधानमन्त्रीले आफ्नो नेतृत्वमा पनि पुनः सोही मन्त्रालयको जिम्मेवारी दिएका थिए ।