पशुपतिमा भ्रष्टाचारको पराकाष्टा, पार्किङ ठेक्कादेखि सबदाह मेसिन खरिदको छानबिन गर्दै अख्तियार

काठमाडौं । पशुपति विकास कोषका सदस्य सचिव मिलनकुमार थापा जलहरी प्रकरणमा डेढ किलो सुन अपचलन प्रकरणमा विशेष अदालतमा सेटिङ गरी सफाइ पाए पनि उनका अरु काण्डमा पनि आयोगले गम्भीर अनुसन्धान गरिरहेको छ ।

सबदाह गर्ने ४ वटा मेसिन खरिद गर्दा तोकिएको मापदण्ड भन्दा कमसल ल्याएको उजुरीमा अख्तियार दुरुपयोग अनुसन्धान आयोगले छानबिन गरिरहेको छ ।

त्यसैगरी, तत्कालीन पर्यटन मन्त्री सुदन किराँतीको कार्यकालमा पार्किङको ठेक्का रद्द गरी नयाँ टेण्डर गरिसकेपछि पुराना ठेकेदारले दायर गरेको मुद्दामा प्रतिउत्तर नलगाएर कोषले गम्भीर भ्रष्टाचार गरेको खुलासा भएको छ । नवीन कोइराला लगायतका बिचौलियाको सेटिङमा अदालतमा मुद्दा दर्ता गरिएको र कोषले प्रतिउत्तर नलगाएको, कानुन ब्यवसायीलाई बहसमा नपठाउनुका साथै कोषकै तलव भत्ता खाने कानुनी सल्लाहकार गणेश केसीले विपक्षमा बोलेपछि एकतर्फी रुपमा कोषको बिपक्षमा फैसला भएको थियो ।

कोषको तलव भत्ता खाएर कोषकै बिपक्षमा रद्द गरिएको पार्किङका ठेकेदारको पक्षमा अदालतमा बहस गर्ने कानुन ब्यवसायी केसीलाई कारबाहीका लागि बार काउन्सिलमा पत्र समेत नलेखिएकाले यसमा कोषका पदाधिकारीकै मिलेमतो रहेको पुष्टि भएको छ ।

पशुपति विकास कोषको पार्किङबाट ठेकेदारले मासिक १५ लाख उठाउने गरेको, अझ कोटीहोम भएको बेला मासिक ३५ लाख रुपैयाँसम्म उठाएको तर कोषले अति कम दरमा ठेक्का दिएकाले पूर्वमन्त्री किराँतीले रद्द गरेका थिए । तर कोषकै मिलेमतोमा रद्द भइसकेको ठेकेदारलाई मुद्दा हाल्न लगाउने, कोषकै कानुन ब्यवसायी केसीले कोषको बिरुद्ध बहस गर्ने गरेपछि एकतर्फी फैसला भएको थियो । पार्किङ ठेक्काको बिषयमा पनि अख्तियारले चासो देखाएको छ ।