गृहसचिव भट्टराईलाई प्रधानमन्त्रीको निर्देशनः सशस्त्रको डीआईजी बढुवा छिटो टुंग्याउनू

काठमाडौं । एमाले–माओवादी, रास्वपा, जसपासहितका पार्टीका नयाँ सत्ता गठबन्धनका दलहरुबीच मन्त्रालय भागबण्डा टुंगो लाग्न सकेको छैन । अर्थमन्त्रालय माओवादी केन्द्रले राख्ने भएपछि गृहमन्त्रालय एमालेको भागमा पुग्ने भएको छ ।
गृहमन्त्रालय एमालेको भागमा पुग्ने भएपछि प्रधानमन्त्री पुष्पकमल दाहाल ‘प्रचण्ड’ले गृहमन्त्रालयका सचिव दिनेश भट्टराईलाई बोलाएर सशस्त्र प्रहरी बलको रिक्त एक डीआईजीमा बढुवा छिटो टुंगो लगाउन निर्देशन दिएका छन् । स्रोतका अनुसार बुधवार बिहान सचिव भट्टराईलाई बोलाएर उनले सशस्त्रको डीआईजी बढुवा छिटो टुंग्याउन निर्देशन दिएका हुन् ।

बिदुर खड्का गएको भदौमा अवकाश भएपछि सशस्त्रमा एक डीआईजीको दरबन्दी रिक्त छ । ७ महिनाअघि रिक्त डीआईजी पदमा बढुवाका लागि राजनीतिक दबाब बढी भएकाले आईजीपी राजु अर्यालले अगाडि बढाउन सकेका थिएनन् ।

सशस्त्रको डीआईजी बढुवाको लागि एसएसपीहरु कृष्ण पाठक, दीपक अधिकारी,  कृष्ण ढकाल, मनिष थापा र दीपेन्द्र कुँवरले आवेदन दिएका छ्न् । आवेदन दिएकामध्ये पाठक नेपाल प्रहरीको टाइपिष्ट(सई)बाट सशस्त्रमा प्रवेश गरेका हुन् । उनी कार्यदक्षता मूल्यांकनमा कमजोर भएर यसअघि एसएसपी बढुवामा परेका थिएनन् ।

बढुवा हुने संभावना नै नभए पनि पाठकले डीआईजी बढुवाको आवेदन दिएका छन् । नेपाल प्रहरीबाट सशस्त्रमा आएकाहरुले स्टाफ कलेज गर्नुपर्ने  ब्यवस्था अन्तर्गत उनले गरेका छैनन् । तर दीपक अधिकारी, दीपक अधिकारी, कृष्ण ढकाल, मनिष थापा र दीपेन्द्र कुँवरले बढुवाका लागि आवश्यक पर्ने स्टाफ कलेज पास गरेकाले उनीहरुको स्वतः नम्बर बढी छ । त्यसो त कृष्ण ढकाल छैटौं पटकमा स्टाफ कलेज पास गरेका एसएसपी हुन् भने कुँवर सशस्त्रको स्टाफ कलेज पास गर्न नसक्ने भएपछि कांग्रेस सभापति शेरबहादुर देउवाको भिटो प्रयोग गरी सेनाको स्टाफ कलेजबाट पास गरेका हुन् ।