रविको चेतावनी होसियार रहनुहोला, किसानले सरकार ढाल्ने क्षमता राख्छन्

काठमाडौं । पूर्वगृहमन्त्री तथा राष्ट्रिय स्वतन्त्र पार्टीका सभापति रवि लामिछानेले किसानले सरकार ढाल्ने क्षमता राख्ने भएकाले होसियार रहन चेतावनी दिएका छन्।

आजको प्रतिनिधिसभाको बैठकमा बोल्दै सभापति लामिछानेले यस्तो बताएका हुन् ।

लामिछानेले भने,’मेरो निर्वाचन क्षेत्र र देशैभरका दूध किसान र मह किसान मारमा परेका छन्। दूध पोखेर बसिरहेका छन् भने अर्कातिर पाउडर दूध र विदेशबाट आयातित नक्कली महले स्थान पाएका छन्। किसानहरूको आन्दोलनलाई नजरअन्दाज गरियो भने किसानहरूले सरकार ढाल्नेसम्मको क्षमता राख्छन्। होशियार रहनुहोला।’

साथै लामिछानेले भूमिहीन सुकुम्बासीहरूलाई चुनावी फन्डाका लागि भूमि दिइन्छ भनेर आश्वासन दिने गरिएको भन्दै त्यसलाई चुनावी फन्डा मात्रै नबनाउन आग्रह गरे।