ओली पथमा रवि लामिछाने र वालेन्द्र शाह, पोलपोलमा देवत्वकरण

काठमाडौं । तत्कालीन नेपाल कम्युनिष्ट पार्टी(नेकपा)को सरकार हुँदा २०७४ देखि २०७८ सम्म शासन संचालन गर्दा तत्कालीन प्रधानमन्त्री केपी शर्मा ओलीलाई देवत्वकरण गर्दै उनका तस्वीर अंकित होर्डिङ बोर्डहरु पोलपोलमा टाँगिए ।

ओलीले महेश बस्नेत, ऐन महर, राजीव पहारी, क्षितिज थेबेहरुलाई आफ्नो प्रशस्ती गान गर्न लगाउने, पोलपोलमा फोटो टाङ्न लगाए । ‘आज होइन, भोलिलाई १० बर्ष केपी ओलीलाई भन्दै नारा उराल्न लगाइयो । तर, २०७४ मा १२१ सिट एक्लै जितेको एमाले २०७९ मा ७८ सिटमा खुम्चियो ।

कांग्रेससँग सत्ता गठबन्धन गरेको १४ महिनामै प्रधानमन्त्रीको कुर्सी छाडेर ओली बालुवाटारबाट हेलिकोप्टरबाट भाग्नुपर्ने परिस्थिति निम्तियो । राजीनामा पनि सेनालाई दिने अवस्था आयो । २०७७ मा एमालेबाट माधव नेपालहरु अलग भएपछि १० बर्ष ओलीले देश चलाउने भने । तर ५ बर्षमै एमाले २५ सीटमा खुम्चिनुपरेको छ ।

२०८२ फागुन २१ गते भएको निर्वाचनमा नेपाली जनताले दुईतिहाईको नजिक बहुमत दिएको राष्ट्रिय स्वतन्त्र पार्टी(रास्वपा) भित्र पनि नेतृत्वलाई देवत्वकरण गर्ने क्रम सुरु भएको छ । रास्वपाको आइतबारदेखि चितवनमा सुरु भएको महाधिवेशनमा पार्टी सभापति रवि लामिछाने र बरिष्ठ नेतासमेत रहेका प्रधानमन्त्री वालेन्द्र शाहको तस्वीर अंकित होर्डिङ बोर्ड भरतपुर महानगरपालिकामात्र होइन, चितवनका सबैतिर टाँगिएको छ ।

नेतृत्वको देवत्वकरण गर्नेमा ओलीपछि रास्वपाका लामिछाने र वालेन्द्र शाह देखिएका छन् । ओलीले एमालेभित्र आफ्ना समकालीन र आलोचनात्मक चेत भएकाहरुलाई पार्टीबाट लखेटिसकेपछि पार्टीका केन्द्रदेखि टोल कमिटीसम्मका कार्यक्रमको ब्यानरमा आफ्नो तस्वीर ठूलो बनाएर राख्नुपर्ने, तस्वीर नराखे कारबाही नै गर्ने आतंक सृजना गरेका थिए । त्यही शैली रास्वपामा देखिएको छ । पोलपोलमा रवि र वालेन्द्रको तस्वीर अंकित होर्डिङ बोर्ड राखिनुले त्यसैको झल्को दिएको अर्थमा लिन थालिएको छ ।