प्रदेश संरचना खारेज गरौं: कमल थापा

काठमाडौं । राष्ट्रिय प्रजातन्त्र पार्टी (राप्रपा) नेपालका अध्यक्ष एवं पूर्वउपप्रधानमन्त्री कमल थापाले प्रदेश संरचना खारेज गर्नुपर्ने बताएका छन् । पार्टीद्वारा आज ललितपुरमा आयोजित एक कार्यक्रममा बोल्दै उनले यस्तो बताएका हुन् ।

उनले संघीयता अन्तरगत प्रदेश संरचना मुलुकका लागि घाँडो भएकाे बताए । अध्यक्ष थापाले वैदेशिक ऋणको भरमा कहिलेसम्म प्रदेश संरचनालाई कायम राख्ने ? भनी प्रश्न समेत गरे ।

उनले भने, ‘यो बिचको प्रदेश संरचना आवश्यक छैन । यसलाई खारेज गर्नुपर्छ भन्ने हाम्रो मान्यता हो । यो प्रदेश संरचना अहिले नेपाललाई घाँडो भएको छ । नेपाली अर्थतन्त्रले धान्न नसक्ने अवस्था छ । कहिलेसम्म विदेशीका ऋण ल्याएर यो प्रदेशको संरचनालाई कायम गर्ने ? नेपाल जस्तो सानो देशमा किन सयभन्दा बढी मन्त्रीहरू चाहिन्छ भन्नु त ? अहिले हरेक प्रदेशमा १०/१२ जना मन्त्रीहरू छन् । किन झन्डै सय जना मन्त्रीहरू चाहियो ? हाम्रो जस्तो सानो देशमा ५/७ सयको सङ्ख्यामा किन सांसदहरू चाहियो भन्नुस् ? चाहिँदैन । त्यसकारण अर्बौँ रुपैयाँ खर्च गरेर ती सांसद र मन्त्रीहरूलाई पालेर राख्नुपर्ने जरुरी छैन । त्यसर्थ, दुई तहको सरकार बनाऔँ भन्ने हाम्रो धारणा हो ।’