गोरखाको धार्चेमा ठूलो सुख्खा पहिरो खस्यो, मानवीय क्षति नभएको प्रहरीको भनाइ

गोरखा । गोरखाको धार्चे गाउँपालिका–१ स्थित ठाडो भ‍र्याङको जंगल क्षेत्रमा शनिबार बिहान ठूलो सुख्खा पहिरो खसेको छ ।

पहिरोका कारण केही ढुंगा र माटो बूढीगण्डकी नदीमा पुगे पनि नदी थुनिने अवस्था नरहेको स्थानीय प्रशासन र गाउँपालिकाले जनाएका छन् ।

धार्चे गाउँपालिका अध्यक्ष लक्ष्मण गुरुङका अनुसार पहिरो खसेको स्थान फराकिलो पाखो क्षेत्रमा रहेकाले तत्काल कुनै जोखिम छैन । नदीमा केही छिटपुट ढुंगा र माटो मात्रै पुगेको उनले बताए ।

गोरखा प्रहरीका अनुसार शनिबार बिहान करिब ९ बजे एक्कासी पहिरो खसेको हो । पहिरोबाट मानवीय क्षति भएको छैन भने धुलो सडकसम्म आइपुगेको छ ।
पहिरो खसेको स्थानमा प्रहरी टोली परिचालन गरिएको बताइएको छ ।