ट्यांकी नै नबनाई साढे ६ लाख भ्रष्टाचार, प्रमुख प्रशासकीय अधिकृतसहित ८ जनाबिरुद्ध मुद्दा दर्ता

काठमाडौं । हुम्लाको चंखेली गाउँपालिका वडा नं. २ स्थित खानेपानीको ट्याङ्की निर्माणको क्रममा फर्जी बिल भर्पाइ पेश गरी ६ लाख ४८ हजार अनियमितता गर्ने प्रमुख प्रशासकीय अधिकृत बिष्णुबहादुर शाहीसहित ६ जनाबिरुद्ध अख्तियार दुरुपयोग अनुसन्धान आयोगले आइतबार बिशेष अदालतमा मुद्दा दर्ता गरेको छ ।

चंखेली गाउँपालिका वडा नं. २ स्थित खानेपानीको ट्याङ्की निर्माणका लागि आ.व. २०७८।०७९ मा मुख्यमन्त्री स्वरोजगार कार्यक्रम अन्तर्गत रकम बिनियोजन भएको थियो । उपभोक्ता समितिलाई कामको जिम्मा दिएकोमा आधा काम बाँकी हुँदै ट्याङ्की निर्माणको काम सकियो भनी फर्जी बिल भरपाई पेश गरी सम्पूर्ण रकम निकासा लिई हिनामिना गरेको भन्ने उजुरी अख्तियारमा परेको थियो ।

अनुसन्धानका क्रममा गाउँकार्यपालिकाको कार्यालयका प्रमुख प्रशासकीय अधिकृत विष्णु बहादुर शाहीले खानेपानी ट्याङ्की निर्माण समेतका कार्यमा काम नै नगरी नभए नगरेको कामलाई भए गरेको भनी नापी किताव, कार्य सम्पन्न प्रतिवेदन र उपभोक्ताको बिलमा चढाई बढी मूल्याङ्कन गरी भुक्तानीको लागि स्वीकृत गरेको खुलेको आयोगले जनाएको छ ।

फिल्डमा नभए नगरेको कामसमेतको ६ लाख ४८ हजार ७ सय ८६ रुपैयाँ भुक्तानी दिएर हानिनोक्सानी र्पुयाई भ्रष्टाचार निवारण ऐन, २०५९ को दफा ८ को उपदफा (१) को देहाय (ङ) ले परिभाषित गरेको कसुर गरेको पुष्टि हुन आएकोले शाहीलाई ६ लाख ४८ हजार ७ सय ८६ रुपैयाँ बिगो माग गरिएको छ ।

त्यसैगरी चंखेली गाउँपालिकाका इन्जीनीयर मानबहादुर ऐडी र प्राविधिक सहायक गोभधन बोहरालाई पनि जनही ६ लाख ४८ हजार ७ सय ८६ रुपैयाँ बिगो मागदाबी गरी मुद्दा दर्ता गरिएको छ ।
लेखापाल नवीन रेग्मी, चंखेली गाउँपालिका २ का तत्कालीन वडाध्यक्ष हरिहर उपाध्याय, उपभोक्ता समितिका अध्यक्ष गोपाल विश्वकर्मा, सचिव प्रयोगलाल जैशी र कोषाध्यक्ष नन्दादेवी देवकोटाबिरुद्ध पनि मुद्दा दर्ता गरिएको छ । उनीहरुसँग पनि जनही ६ लाख ४८ हजार ७ सय ८६ रुपैयाँ बिगो मागदाबी गरिएको छ ।