आईजीपीको निर्देशन एसपीले टेरेनन्, घुमुवा खटाउँदै कमाउधन्दा संचालन

काठमाडौं । सशस्त्र प्रहरी बलका आईजीपी राजु अर्यालले नियुक्ति भएलगत्तै २०७९ जेठमा देशभरका गण, गुल्म र बीओपीले सादा पोशाकमा सशस्त्र प्रहरी नखटाउन निर्देशन दिएका थिए । तर आईजीपीको निर्देशन अटेर गर्दै गण, गुल्म र बीओपीका इन्चार्जहरुले सादा पोशाकका घुमुवा खटाउँदै भन्सारछली तस्करी गर्नेहरुबाट घुस असुल्ने गरेका छन् ।

सीमा सुरक्षा र भन्सारछली तस्करी नियन्त्रणका लागि परिचालित सशस्त्र प्रहरीका गण, गुल्म र बीओपीका इन्चार्जहरुले घुमुवा खटाएर अतिरिक्त कमाइको माध्यम बनाएको ब्यापक गुनासोपछि आईजीपी अर्यालले १ बर्षअघि उक्त निर्देशन दिएका थिए । तर त्यो निर्देशन शक्तिको आडमा गण, गुल्म र बीओपीका इन्चार्ज भएकाहरुले पालना नगरेको पाइएको छ ।

यसैक्रममा ८ नम्बर गण धनुषाका एसपी दिनेश मल्लले हवलदार श्यामसुन्दर प्रसाद यादवलाई जिल्लामा तस्करीको सेटिङमा खटाएका छन् । सशस्त्रमा १४ बर्षअघि सेवाप्रवेश गरेका श्यामसुन्दर यादव १३ बर्षदेखि धनुषाको गणका घुमुवामा कार्यरत छन् । उनको दरबन्दी पर्वत जिल्लामा छ । तर उनलाई दरबन्दीमा नपठाई एसपी मल्लले काजमा राखेर असुलीमा लगाएका छन् । यादवको काम तस्करहरुसँग हप्ता उठाएर एसपी मल्ललाई दिने हुँदैआएको छ ।

सशस्त्रका आईजीपी राजु अर्यालको निर्देशन अनुसार सबै सबै पुराना बदनाम घुमुवा लखेटिए पनि यादवलाई गणपति मल्लले राखिरहेका छन् । उनले बाहिनीको नाममा समेत तस्करहरुबाट उठाउने गरेका छन् ।

सीमाबाट तस्करी गर्ने सुरेश साह, उमेश साह, अहसान छोटे, समतुल्लाह लगायतबाट दररेट तोकेर तस्करीको लाइन दिने गरेका छन् । इनर्वा नाकादेखि धनुषाका अन्य नाकाबाट तस्करी गर्नेहरुबाट समेत उनले लाइन दिने गरेका छन् । नेपालबाट भारततर्फ ठूलो मात्रामा मदिराको तस्करी हुने गरेको छ । अलौदिन,अयूबले नेपालबाट गोरु भारततर्फ लाने गरेका छन् ।

त्यसैगरी, महोत्तरीका नेपाल प्रहरीका एसपी प्रकाश मल्लले असई राजेश यादवलाई घुमुवा राखेर अतिरिक्त कमाइको लागि परिचालन गरेका छन् । सबै विवादित घुमुवाहरुको सरुवा भए पनि उनको भएको छैन । एआईजी मिरा चौधरीले अनुगमन गरेपछि धेरै विवादित घुमुवाको सरुवा भए पनि यादवलाई भने एसपी मल्लले यथावत राखेका छन् ।

त्यसो त धनुषाका एसपी विश्वराज खड्काले सई बब्लु ठाकुरलाई घुमुवा राखेको बिषयमा आईजीपी बसन्त कुँवरको निर्देशनपछि उदयपुर सरुवा गर्न बाध्य भएका थिए । उदयपुर सरुवा भए पनि बब्लुले हरेक हप्ता धनुषामा आई तस्करदेखि क्रसरसँग सेटिङ गर्ने काम जारी राखेको स्रोतको दाबी छ ।