कतार पठाईदिन्छु भनी रकम ठगी गर्ने पुरुष पक्राउ

काठमाडौं। वैदेशिक रोजगारका लागि कतार पठाइदिन्छु भन्दै रकम ठगी गर्ने एक पुरुषलाई प्रहरीले पक्राउ गरेको छ ।

सिन्धुपाल्चोक लिसंखुपाखर–१, ठूलो धादिङ घर भई काठमाडौं गोकर्णेश्वर बस्ने ३६ वर्षीय बिसु लामालाई आइतबार पक्राउ गरिएको काठमाडौं उपत्यका अपराध अनुसन्धान महाशाखाले जनाएको हो ।

लामाले तारा बहादुर वली नाम गरेका एक जना व्यक्तिलाई आकर्षक तलबमा कतार पठाईदिने आश्वासन दिएको र पीडितबाट रकम लिई सम्पर्क विहीन भएका थिए ।

वैदेशिक रोजगार विभागमा पीडितले दिएको उजुरीका आधारमा प्रहरीले खोजतलास गर्ने क्रममा लामालाई यही असार १ गते बौद्धबाट पक्राउ गरेको महाशाखाका सूचना अधिकारी रविन्द्र रेग्मीले बताए ।

उनका अनुसार पक्राउ परेका लामालाई थप अनुसन्धान तथा कारवाहीको लागि वैदेशिक रोजगार विभाग बुद्धनगर, काठमाडौं पठाईएको छ ।