सीसीटीभी फुटेज नै डिलिट गरी बजेटका दर हेरेफेर गर्ने नासु घिमिरेबिरुद्ध मुद्दा दर्ता

काठमाडौं । अख्तियार दुरुपयोग अनुसन्धान आयोगले भन्सार विभाग, काठमाडौँका तत्कालीन नायव सुब्बा रघुनाथ घिमिरेका बिरुद्ध २ करोड १४ लाख ४६ हजार ६ सय ५ रुपैयाँ २४ पैसाको वैधानिक स्रोत पुष्टि हुन नसकेकाले त्यति नै रकम बिगो दाबी गर्दै आइतबार बिशेष अदालतमा मुद्दा दर्ता गरेको छ । घिमिरेकी पत्नी शारदा गौतमका बिरुद्ध पनि मुद्दा दर्ता गरेको छ । बजेटमा करका दर हेरफेर गर्ने र सीसीटीभी फुटेज डिलिट गर्ने मुख्य योजनाकार तत्कालीन अर्थमन्त्री जनार्दन शर्मालाई भने अख्तियारले मुद्दा दर्ता नगरी उन्मुक्ति दिएको छ ।

एयरपोर्ट भन्सार, विभिन्न भन्सार कार्यालय र राजश्व अनुसन्धान विभागमा बसेर राजश्व हिनामिना गरी राजश्व छल्ने कार्य गरेको, गैरकानूनी काम गरी राजश्वका विभिन्न कार्यालयमा बसी करोडौं सम्पत्ति कमाएर श्रीमती लगायत परिवारका विभिन्न व्यक्तिहरुको नाममा लुकाएर राखेको, विभिन्न कम्पनीहरुमा लगानी, शेयर खरिद, जग्गा खरिद लगायतको कार्य गरी गैरकानूनी सम्पत्ति आर्जन गरी भ्रष्टाचार गरेको उजुरीमा छानबिन गर्ने क्रममा घिमिरेले २ करोड १४ लाख ४६ हजार ६ सय ५ रुपैयाँ २४ पैसाको बैधानिक स्रोत देखाउन नसकेकाले उनीबिरुद्ध मुद्दा दर्ता गरेको आयोगका प्रवक्ता भोला दाहालले जारी गरेको विज्ञप्तिमा उल्लेख छ ।

सार्वजनिक सेवामा प्रवेश गरेको मिति २०५२ कात्तिक २८ देखि २०७९ पुस १२ सम्मको अनुसन्धान जाँच अवधिमा घिमिरेको वैधानिक आयमा उनको पारिश्रमिक, उनकी श्रीमती शारदा गौतमको पारिश्रमिक, उनको छोरीको पारिश्रमिक आय, कर्मचारी संचयकोष लगायत विभिन्न बैंक तथा वित्तीय संस्थाहरुबाट लिएको कर्जा, जग्गा बिक्री, घर बहाल (घर भाडा), कम्पनी लाभांश वापत प्राप्त वैधानिक आय समेत जोड्दा ५ करोड २५ लाख १६ हजार ३ सय २७ रूपैयाँ ४४ पैसा बैधानिक आय देखिन्छ । जसमा श्रीमती शारदा गौतमले अभिकर्ता कमिसन वापत प्राप्त रकम, राजस्व अनुसन्धान विभागबाट प्राप्त गरेको पुरस्कार, शेयर बिक्री, नगद लाभांश आय र अवकाश पश्चात प्राप्त आयसमेत जोडिएको छ ।

सोही जाँच अवधिमा घिमिरेको सम्पूर्ण व्यय (खर्च तथा लगानी) मा जग्गा खरिद, घर निर्माण, रजिष्ट्रेशन दस्तुर र पूँजीगत लाभकरमा भएको खर्च, विभिन्न कम्पनीहरुको शेयर खरिदमा भएको खर्च, कर्जा र ऋणको साँवा व्याज तिरेको रकम, जीवन बीमा प्रिमियम तिरेको खर्च रकम, अध्ययन खर्च, कम्पनी लगानीमा भएको खर्च, विद्युतीय उपकरण खरिदमा भएको खर्च, बैंक मौज्दात रकम, विदेश भ्रमण खर्च, सुन तथा चाँदी खरिदमा भएको खर्चसमेत गरी जम्मा रु. ७ करोड ३९ लाख ६२ हजार ९ सय ८४ रुपैया ६७ पैसा खर्च तथा लगानी गरेको देखिन्छ । घिमिरेको कुल बैधानिक आयलाई उनले गरेको कुल व्ययसँग तुलना गर्दा आयभन्दा रु. २ करोड १४ लाख ४६ हजार ६ सय ५ रुपैयाँ २४ पैसाको बैधानिक स्रोत पुष्टि हुन नसकेको अख्तियारले जनाएको छ ।

प्रचलित कानूनबमोजिम सार्वजनिक पद धारण गरेको राष्ट्रसेवक कर्मचारीले पदमा बहाल रहँदाका बखत अमिल्दो तथा अस्वभाविक सम्पत्ति आर्जन गर्नुका साथै मनासिब कारणबिना अमिल्दो र अस्वभाविक उच्च जीवनस्तर यापन गरेको पुष्टि हुन आएको र २ करोड १४ लाख ४६ हजार ६ सय ५ रुपैयाँ २४ पैसा बराबरको सम्पत्ति गैरकानूनी रूपमा आर्जन गरेकाले साविक भ्रष्टाचार निवारण ऐन¸ २०१७ को दफा १५ एवं प्रचलित भ्रष्टाचार निवारण ऐन, २०५९ को दफा २० को उपदफा (१) बमोजिमको कसूरमा मुद्दा दर्ता भएको आयोगको विज्ञप्तिमा उल्लेख छ । घिमिरेलाई २ करोड १४ लाख ४६ हजार ६ सय ५ रुपैयाँ २४ पैसा बराबरको विगो कायम गरी मुद्दा दर्ता गरिएको छ ।

पूर्व नासु घिमिरेले जाँच अवधिमा गैरकानूनी रुपमा आर्जन गरेको सम्पत्ति उनको श्रीमती शारदा गौतमको नाममा हाल कायम रहेको स्रोत नखुलेको, आंशिक स्रोत नखुलेको र अपुग विगोको हकमा स्रोत खुलेको सम्पत्तिबाट साविक भ्रष्टाचार निवारण ऐन, अनुसार मुद्दा दर्ता गरेको छ ।