ममाथि गरेको अत्याचारका कारण तिमीहरू सब रसातलमा पुग्दैछौ : रवि लामिछाने

काठमाडौं । आगामी फागुन २१ गते हुन लागेको प्रतिनिधिसभाको निर्वाचनको मनोनयन गर्ने दिन पर्सा जिल्ला अदालतले सहकारी ठगी प्रकरणमा राष्ट्रिय स्वतन्त्र पार्टीका सभापति रवि लामिछानेसँग १ करोड धरौटी माग गरेपछि उनी निर्वाचन कार्यालयमा उम्मेदवारी दिन जान पाएनन् ।

आजै पर्सा जिल्ला अदालतले लामिछानेसँग धरौटी माग गरेको छ भने काठमाडौं र रुपन्देहीमा पनि उनको सहकारी ठगीको मुद्दा चलिरहेको छ ।

उनी पर्सा जिल्ला अदालतमा धरौटी बुझाउन पुगेकाले उम्मेदवारी मनोनयनमा त पुग्न नसकेपछि सामाजिक संजालमा लामिछानेले आफूमाथि गरेको गरेको पाप र अत्याचारको हिसाव किताब नेपाली जनताले फागुन २१ मा घण्टी बजाएर दिने भावुक स्टाटस पोष्ट गर्दै लेखेका छन्–‘ देश निर्वाचनमय छ ।

देशभर मनोनयन दर्ताको रौनक चलिरहेको छ । तर बिडम्बना, यो उत्साहमा म पूर्ण उत्साहित भएर मिसिन सकिरहेको छैन । किनकी आजै देशका तीनवटा (पर्सा, काठमाण्डौ र रूपन्देही) अदालतमा मेरो मुद्दाको सुनुवाई चलिरहेको छ ।

अरू अदालतको आदेश आउदै होला । पर्सा जिल्ला अदालतबाट म भर्खर निस्किएको छु । चितवन(२ मा मेरा शुभचिन्तक बाटो कुरीरहेका छन्, भ्याएसम्म मनोनयनका लागि आफै उपस्थित हुने प्रयासमा छु। नसकेको खण्डमा वारेस मार्फत मनोनयन दर्ता हुनेछ ।

म माथी गरेको पाप र अत्याचारको हिसाव किताब नेपाली जनताले फागुन २१ मा घण्टी बजाएर दिनेछन् ।देशका सम्पूर्ण अपराधीहरू एक ठाउँमा जम्मा भएर म माथि गरेको अत्याचारका कारण तिमीहरू सब रसातलमा पुग्दै गरेको दृश्य इतिहासले देख्दैछ र लेख्दैछ । नभएको प्रमाण छ भन्ने, पापी हौ तिमीहरू । सहकारीको बाटै नहिडेको मान्छेलाई गनेरै नभ्याइने मुद्दै मुद्दा लगाउने अत्याचारी हौ तिमीहरू ।

मलाई जिउँदो छोडेर तिमीहरुले एउटा गुण लगाएका छौँ । म तिमीहरू सबैको गुण तिर्छु, चाँडै तिर्छु,बिना प्रतिशोध तिर्छु ।  फेरि पनि भन्छु म अभिमन्यु होइन।