हामीबाट भएका कमजोरीको समीक्षा गर्दै गल्तीप्रति आत्मालोचित होऔं : योगेश भट्टराई

काठमाडौं । नेकपा (एमाले)का सचिव योगेश भट्टराईले भएका कमजोरीको समीक्षा गर्दै गल्तीप्रति आत्मालोचित हुन सबैमा आग्रह गरेका छन् । उनले संगठन र नेतृत्वको नयाँ ढंगले पुनर्गठन गर्न र यो काम होशियारीपूर्वक गर्नुपर्ने कुरामा जोड दिएका छन् ।

जनतामा जाने र जनतालाई सुन्ने र त्यस अनुसार निर्णय गर्नुपर्ने उल्लेख गर्दै सामाजिक संजालमा भट्टराई लेख्छन्–हामी यतिबेला इतिहासकै गंभीर संकटको अवस्थामा छौ । देश र समाज भयानक अस्थिरतामा छ । हामी सबै तनावमा छौ । यस्तो अवस्थामा उत्तेजनामा आएर गरिने निर्णयले हामीलाई सही ठाऊँमा पुर्याउँदैन ।

तसर्थ,

१. विकसित घटनाहरूलाई राम्रोसित बिश्लेषण गरौं, हामीबाट भएका कमजोरीको समीक्षा गरौ । गल्तीप्रति आत्मालोचित होऔं ।

२. पार्टी संगठन र नेतृत्वको नयाँ ढंगले पुनर्गठन गरौं । यो काम होशियारीपूर्वक गरौ । जसले हाम्रो पार्टी एकता कायम गरोस् ।

३. पार्टीमा आम सदस्यहरूको अपनत्व र सहभागिता सुनिश्चित गरौं ।

४. पार्टीका आन्तरिका प्रक्रियाहरूलाई पूर्णतः पारदर्शी र लोकतान्त्रिक बनाऔं ।

५. जनतामा जाऔं, जनतालाई सुनौं र त्यस अनुसार निर्णय गरौं ।

६. लोकतन्त्र, बहुदलीय प्रतिस्पर्धा, मानवअधिकार, प्रेस स्वतन्त्रता, संविधानको सर्वोच्चता, कानूनको शासन यो जवजको आत्मा हो, यसबाट दाँया–बाँया नजाऔं ।

७. खरानीबाट उठेर देशको पुनर्निर्माण गर्नु छ । नेपालको हित चिताउने सबैसँगको समन्वयबाट यो काम सम्पन्न गर्ने अठोट गरांै ।

८. हिमाल, पहाड़, तराई, सबै जात, जाति र भाषा, भाषीबीचको एकतालाई बलियो बनाऔं ।

९. देशभित्रको आन्तरिक सहमति अनी संवैधानिक तथा लोकतान्त्रिक मूल्य, मान्यताअनुरूप निकास दिनुपर्दछ । बिश्व समुदायले नेपालीहरूको उक्त प्रयत्नलाई सहयोग गर्नुपर्दछ । यही आधारमा अतर्राष्ट्रिय समुदायलाई आह्वान गरौं ।

१०. जेन–जी समूहले अघि सारेका भ्रष्टाचार र बेथिति अन्त्य गर्ने मागलाई समर्थन र कार्यान्वयनमा सहयोग गरौं ।
नेपाल बचाऔं, नेपालीत्व जोगाऔं