सशस्त्र प्रहरीकै मिलेमतोमा तस्करीको माछा नेपाल भित्रंदै

नवलपरासी । नेपाल माछामा आत्मनिर्भर जस्तै छ । तर आन्धप्रदेश लगायतका भारतका बिभिन्न ठाउँबाट आउने घातक रसायन फर्मालिन राखिएका माछा निर्वाध रुपमा भित्रने गरेकाले नेपालको माछा ब्यवसायी नै पलायन हुनुपर्ने अवस्था आइरहेको छ । भारतका नाकाबाट खसीबोका भित्रंदा नेपालमा बाख्रापालन ब्यवसायमा पनि असर पर्दैगएको छ ।

तस्करीको कुखुराले नेपाली ह्याचरी ब्यवसायी धरासायी भइसकेको छ । राँगा र भैंसी पनि भारतबाट ब्यापक रुपमा भित्रने गरेको छ ।

बीरगंज र बाराबाट भारतीय नागरिक विपिन साह तुरहाले टनका टन भारतीय माछा नेपाल भित्र्याउने गरेका छन् भने नवलपरासीबाट अमिन मियाँले । नवलपरासी पश्चिमको भुजहवा नाकाबाट राति राति माछा तस्करीका माध्यमबाट नेपाल भित्रने गरेको छ । जसको भिडियोसमेत नेपालफेसलाई प्राप्त भएको छ ।

नवलपरासीको भुजहवा नाकाबाट सेटिङमा तस्करीको माछा भित्र्याउनेहरुमा भारतीय ब्यापारी अमिन मियाँ, माष्टर गुड्डो, आजादलगायत छन् । मियाँको यो समूहले राँगा, खसी र माछा तस्करी गर्ने गरेको छ । सशस्त्र प्रहरी बलको मिलेमतोमा मियाँसहितका यी ब्यापारीले तस्करीको माछा, खसी र राँगा भारतबाट निर्वाध नेपालमा भित्र्याउने गरेको आरोप छ ।

सशस्त्र प्रहरीह बल २६ नम्बर गण नवलपरासी(पश्चिम)का गणपति (एसपी) सन्तोष रायमाझी, बीओपी भुजहवाका सई सत्यनारायण यादवसँग सेटिङ मिलाएर राँगा, माछा र खसी नेपालमा तस्करी हुने गरेको छ ।

अमिन मियाँले नवलपरासीका भुजहवा लगायतबाट कुखुरा पनि तस्करी गर्ने गरेका छन् । केही दिनअघि नवलपरासी प्रहरीले मियाँले तस्करी गरी भित्र्याएको कुखुरा बरामद गरेको थियो ।