मेयर र प्रहरीसँग सेटिङ, ब्यास नगरपालिकामा मापदण्डविपरीत क्रसर संचालन

पोखरा । तनहुँको ब्यास नगरपालिकास्थित मादीघाटमा विनाटेण्डर नदीजन्य पदार्थ उत्खनन भइरहेको छ । ब्यास नगरपालिकाबाट मादी नदीको बालुवा, गिटी उत्खनन गर्ने ठेक्का पाएका बलबहादुर शाहीले मापदण्डबिपरीत नदीदोहन गर्दैआएको स्थानीयको गुनासो छ ।

ठेकेदार बलबहादुर शाहीले मादी नदीमा मापदण्डबिपरीत स्काभेटर प्रयोग गरी निकालिएको गिटी–बालुवा र ढुंगा दैनिक दसौं टिपरमा ओसार्ने गरेका छन् । पहिला ब्यास नगरपालिकाले अमानतमा नदीजन्य पदार्थको १ टिफरको १ हजार १ सय रुपैयाँ रोयल्टी(राजस्व) लिने गरेको थियो । तर बलबहादुर शाहीले ठेक्का लिएपछि नगरपालिकाका मेयर बैकुन्ठ न्यौपानेसँग सेटिङ गरी मनोमानी ढंगले १ टिफरबाट १ हजार ६ सय रुपैयाँसम्म रोयल्टीका नाममा असुल्ने गरेका छन् ।

यस्तो मनपरी असुल्ने छुट मेयर न्यौपानेले उनलाई दिएका छन् । जसमा प्रहरीसमेत मौन बस्ने गरेको छ । जिल्लाका प्रहरीका हाकिमहरुलाई समेत बलबहादुरले सेटिङ गरी मनपरी गर्ने छुट पाएको स्रोत बताउँछ ।

मादी नदीबाट १६ लाख घनमिटर मात्र नदीजन्य पदार्थ निकाल्न पाउने भए पनि त्योभन्दा धेरै बढी उत्खनन् गरी भावी दिनमा प्राकृतिक विपत्ति निम्त्याउने कार्य भइरहेको छ । यस्तो मनपरी नदीदोहनको छुट शाहीलाई मेयर न्यौपानेले दिएका छन् ।

त्यतिमात्र होइन, मादीघाटमै बलबहादुर शाहीले ढुंगाखानी पनि संचालन गर्दैआएका छन् । खानी बिभागबाट स्वीकृति लिएका उनले त्यहाँ पनि मापदण्ड पालना नगरेको आरोप छ ।
मेयर न्यौपानेले टेण्डर गरेर क्रसर संचालन गर्न दिइएको बताए । चौथोपटकसम्म टेण्डर गरी शाहीलाई नदीजन्य पदार्थको ठेक्का दिइएको उनले बताए ।

मापदण्डविपरीत स्काभेटर प्रयोग गरी नदी दोहन गर्दैआएका शाहीले ब्यास नगरपालिकाका मेयर न्यौपानेमात्र होइन, प्रहरीसँग समेत सेटिङ मिलाएको स्रोत बताउँछ । ठेकेदार शाहीले खानीबाट राति राति ढुंगा उत्खनन् गर्दा स्थानीयलाई हिंडडुल गर्न समेत सास्ती भएको गुनासो नगरपालिका र प्रहरीले नसुनेको आरोप छ ।

अरु टिपरलाई चुली हालेको खण्डमा प्रहरी सेटिङमा नियन्त्रणमा लिएर चिट काट्ने गरिएको छ । तर मेयरसँग सेटिङ भएकाले बलबहादुर शाहीको सेटिङमा नदीबाट टिपरको ढाला भन्दा १ हातमाथिसम्म चुली बनाएर बालुवा गिटी लैजान प्रहरीले छुट दिइएको छ ।

शाहीले विनानम्बर प्लेटका टिपर चलाउँदा पनि प्रहरी प्रशासनले नियन्त्रणमा नलिएको गुनासो स्थानीयको छ । स्रोतका अनुसार केही समयअघिसम्म बलबहादुरले प्रहरी नायब निरीक्षक(सई) प्रकाश खत्रीलाई चौबीसै घन्टा आफ्नो गाडीमा लिएर हिंड्ने गरेका थिए । यसले पनि उनकोे प्रहरीसँग कतिसम्म सेटिङ रहेको छ भने दर्शाउँछ । प्रहरीसँग सेटिङ गरी ढाला राखेर टिपर संचालन गर्न दिइएकोबारेमा जिल्ला प्रहरी कार्यालय तनहुँका एसपी वीरेन्द्र शाहीले भने–ढाला राख्ने टिपर नियन्त्रणमा लिएर कारबाही गरिएको छ ।

टिपरलाई ढाला राखेर निर्वाध चलाउन दिने प्रहरीले ट्याक्टरलाई घाटको रोयल्टी नतोकी मनपरी रोयल्टी लिने छुट दिएको छ । ट्याक्टर व्यवसायी संघका अध्यक्ष तुल्सी सापकोटा, मदन तिमिल्सिना, कृष्ण श्रेष्ठलगायतका ट्याक्टर व्यवसाय समिति नगरपालिका डेलिगेसन जाँदा पनि नगरपालिकाले रोयल्टी नतोकी मनपरी असुल्न बलबहादुरलाई छुट दिएको स्रोत बताउँछ ।

भोर्लेटार चोकबाट ढुंगा बालुवा बोकेका टिपर चलाउन निषेध गरिएको छ । तर विनाटेण्डर मापदण्डबिपरीत उत्खनन गरिएका नदीजन्य पदार्थ बोकेका टिपर शाहीले भोर्लेटार चोकबाट नै लाने गरेका छन् । दुम्सीचौरको बाटोबाट लोड भएका टिपर लैजानुपर्ने भने पनि बलबहादुरले निरन्तर भोर्लेटारचोकबाटै लाने गरेका छन् । भोर्लेटारबाट अरु ब्यवसायीले टिपर चलाएमा बलबहादुर शाहीले प्रहरीका जिल्लाका हाकिमलाई सिधै फोन गरी नियन्त्रणमा लिन लगाई चिट काट्न लाउने गरेको आरोप छ ।

पर्यटकीयस्थल मानुङकोटमा व्यास नगरपालिकाले कसैलाई स्थायी संरचना बनाउन दिएको छैन तर बलबहादुर शाहीले तीन तले भवन बनाइरहेका छन् । होटल संचालनका लागि उनलाई स्थायी संरचना बनाउन दिएको छ । मानुङकोटमा अरुलाई संरचना बनाउन रोकेका मेयर न्यौपानेले शाहीलाई सेटिङमै अनुमति दिएको आरोप छ ।

बलबहादुर शाही र गुण्डानाइके विक्रम लामाबीच समेत बाक्लो उठबस रहेको छ । लामाका २ वटा ट्याक्टर रोयल्टी समेत नलिई सिंत्तैमा नदीजन्य पदार्थ ओसार्न दिएका छन् । शाहीले तनहुँका सांसद शंकर भण्डारीसम्म सेटिङ मिलाएर मादीघाटमा मापदण्डबिपरीत नदीजन्य पदार्थ दोहन गरिरहेका छन् ।