सिन्धुपाल्चोकको त्रिपुरासुन्दरीमा जन्ती बोकेको बस दुर्घटना, ३ को मृत्यु

काठमाडौं । सिन्धुपाल्चोकको त्रिपुरासुन्दरी गाउँपालिकामा बस दुर्घटना हुँदा ३ यात्रुको मृत्यु भएको छ ।

तौथली–पिस्कर सडक खण्डको धारावतीमा सडकबाट करिब २ सय मिटर तल खसेको बसमा ५५ यात्रु सवार थिए । उनीहरु भीमेश्वर नगरपालिका–१ दोलखाबाट बिहीबार बिहान त्रिपुरासुन्दरी गाउँपालिकाको पिस्करमा बिहेको जन्ती जाँदै थिए ।

दुर्घटनाग्रस्त बसमा च्यापिएका एक यात्रु निकाल्ने प्रयास भइरहेको छ । गम्भीर घाइते चार जनालाई एम्बुलेन्सबाट खाडीचौरस्थित सिन्धु सदाबहार अस्पताल पठाइएको छ ।

सामान्य घाइतेहरुको स्थानीय वडा कार्यालयमा राखेर स्थानीय स्वास्थ्य चौकीका स्वास्थ्यकर्मी मार्फत प्राथमिक उपचार भइरहेको छ ।