सशस्त्र प्रहरीको एक्सन : भारततर्फ तस्करी गर्न लागिएको पाँच गाडी खरबुजाको बीउ बरामद

मलंगवा । मधेश प्रदेशका सीमा नाकाबाट खरबुजाको बिउ भारत तस्करी हुने गरेको छ । पछिल्ला दिनमा रौतहटदेखि सर्लाहीमा खरबुजाको बिउ बरामद भएपछि यसको तस्करी बढेको तथ्य खुलेको हो । नेपालबाट चिनियाँ स्याउ, सुपारी, मरिच र केराउ भारत तस्करी हुने गरेको भए पनि पछिल्ला दिनमा खरबुजाको बिउको तस्करी बढेको छ ।

बिहीबार बिहान सर्लाहीको बलरा नगरपालिका–२ स्थित हतिवल बाँध नजिकको सीमावर्ती क्षेत्रमा सशस्त्र प्रहरी बलले सञ्चालन गरेको बिशेष अपरेशनका क्रममा करिब १ करोड रुपैयाँ बराबरको खरबुजाको बिउ बरामद भएको छ । रौतहटपछि सर्लाहीमा भारत तस्करी गर्न लागेको खरबुजाको बिउ बरामद भएपछि सीमामा भइरहेको संगठित तस्करीको रहस्य खुलेको हो ।

सशस्त्र प्रहरी बल, नेपाल सीमा सुरक्षा गुल्म मुख्यालय सिमराबाट सशस्त्र प्रहरी नायव उपरीक्षक विष्णुदत्त अवस्थी, सीमा सुरक्षा गुल्म मुख्यालय मलंगवाबाट सशस्त्र प्रहरी नायव उपरीक्षक विष्णु अधिकारी र नम्बर १० गण मुख्यालय सर्लाहीबाट सशस्त्र प्रहरी निरीक्षक कृष्ण गुरुङको कमाण्डमा खटिएको करिब ८० जनाको टोलीले ठूलो परिमाणको उक्त बिउ बरामद गरेको जनाइएको छ ।

सशस्त्र प्रहरीका अनुसार नेपालबाट भारततर्फ अवैध रूपमा लैजाँदै गरिएको २ सय बोरा खरबुजाको बिउ ४ वटा भारतीय नम्बर प्लेटका बोलेरो गाडी र एउटा नेपाली नम्बर प्लेटको मिनी ट्रकमा लोड गरिएको अवस्थामा फेलापरेको थियो । प्रहरी टोली घटनास्थलमा पुगेपछि तस्करीमा संलग्न व्यक्तिहरू गाडी तथा सामान छाडेर भागेका थिए ।
बरामद गरिएको खरबुजाको बिउको अनुमानित मूल्य एक करोड रुपैयाँ रहेको सशस्त्र प्रहरीले जनाएको छ ।

सीमाक्षेत्रका विभिन्न गाउँमा गोदाम बनाएर कृषिजन्य उत्पादनहरु राति राति भारत र्पुयाउने गरिएको छ । सुरक्षा स्रोतहरूका अनुसार, आज बिहान छतौना क्षेत्रबाट सशस्त्र प्रहरीले नियन्त्रणमा लिएका पाँचवटा सवारीसाधनमा रहेको खरबुजाको बिउ तथा अन्य सामानको स्वामित्वबारे समेत अनुसन्धान भइरहेको छ ।

प्रारम्भिक रूपमा बरामद सामान हरिऔन निवासी सन्तोष साह तथा बलरा नगरपालिका–स्थित हथिऔल निवासी तथा नेपाल प्रहरीका पूर्व वरिष्ठ हवल्दार राजमंगल सिंह, विजय यादवको भएको आशंका गरिएको छ । तर, यस विषयमा सम्बन्धित सुरक्षा निकायले आधिकारिक रूपमा कुनै पुष्टि गरिसकेको छैन । अनुसन्धान जारी रहेकाले थप विवरण आउन बाँकी रहेको बताइएको छ ।