गृहमन्त्री गुरुङलाई तत्काल बर्खास्त गरी छानबिन गर्न जेनजी मुभमेन्टको माग

काठमाडौ । बिचौलिया दीपक भट्टको कम्पनीको करोड करोडका सेयर अपारदर्शी ढंगले खरिद गरेका गृहमन्त्री सुधन गुरुङलाई तत्काल पदबाट बर्खास्त गरी पक्राउ गर्नुपर्ने माग जेनजी मुभमेन्ट नेपालले गरेको छ । जेनजी मुभमेन्ट, नेपालका प्रवक्ता विजय शाहले विज्ञप्ति जारी गरी पदमै रहँदा गृहमन्त्री गुरुङविरुद्ध लागेका गम्भीर आरोपको निष्पक्ष छानबिन हुन नसक्ने बताएका हुन् ।

गृहमन्त्री गुरुङमाथि उठेका गम्भीर आरोपहरूलाई लिएर हामी सरकारसँग कडा माग गर्दछौँ । उनलाई तत्काल बर्खास्त गरी पक्राउ गरियोस् । निष्पक्ष अनुसन्धान अघि बढाइयोस्,’, विज्ञप्तिमा भनिएको छ । ‘पदमै बसेर छानबिन गर्न सम्भव छैन । यो स्पष्ट रूपमा कन्फ्लिक्ट अफ इन्ट्रेस्ट हो । जसले न्याय प्रक्रियामाथि नै गम्भीर प्रश्न उठाउँछ । मन्त्री पदको ओहोदामा रहेर आफ्नैविरुद्ध छानबिन हुन सक्दैन। यो आधारभूत नैतिकता र कानुनी सिद्धान्तविपरीत छ ।’

जेनजी मुभमेन्टको वक्तव्यमा सरकारलाई मन्त्री नियुक्तिमा परिपक्वता, दूरदर्शिता र जवाफदेहिता देखाउन पनि आग्रह गर्दै हचुवाको भरमा मन्त्री नियुक्त गर्ने र हटाउने प्रवृत्ति अस्वीकार्य रहेको उल्लेख गरिएको छ ।

गृहमन्त्री गुरुङले जेनजी आन्दोलनपछि अपारदर्शी रुपमा सेयरदेखि सम्पत्ति जोडेका तथ्य एकपछि अर्को गरी खुलिरहेका छन् । उनका बाबु दीलबहादुर गुरुङले गैंडाको खाग तस्करीमा संजाय भुक्तान गरिसकेको ब्यक्ति भएको तथ्य पनि खुलेको छ ।