रवि विरुद्ध संगठित अपराध र सम्पत्ति शुद्धिकरणको अभियोग फिर्ता लिने निर्णय

काठमाडौं । महान्यायाधिवक्ता कार्यालयले राष्ट्रिय स्वतन्त्र पार्टी (रास्वपा) का अध्यक्ष तथा पूर्व गृहमन्त्री रवि लामिछानेविरुद्ध विभिन्न जिल्ला अदालतमा विचाराधीन संगठित अपराध र सम्पत्ति शुद्धीकरणसम्बन्धी मुद्दा फिर्ता लिने निर्णय गरेको छ ।

यस निर्णयसँगै कास्की, रुपन्देही, काठमाडौं र पर्सा जिल्ला अदालतमा दायर ती अभियोगहरू फिर्ता हुनेछन । महान्यायाधिवक्ता कार्यालयले बुधबार चारवटै जिल्लाका अभियोगपत्र संशोधन गर्न अनुमति दिएको हो ।

महान्यायाधिवक्ता सबिता भण्डारी बरालका अनुसार सहकारी ठगीसम्बन्धी मुद्दा भने यथावत रहनेछ । “सहकारी ठगीको मुद्दा कायम नै छ, संगठित अपराध र सम्पत्ति शुद्धिकरणको अभियोग फिर्ता लिने प्रयोजनका लागि मात्रै आरोपपत्र संशोधन गर्न स्वीकृति दिइएको हो,” उनले भनिन् ।

यो निर्णयपछि जिल्ला अदालत कास्कीमा चलिरहेको संगठित अपराध र सम्पत्ति शुद्धीकरणसम्बन्धी मुद्दा औपचारिक रूपमा फिर्ता हुने जनाइएको छ । महान्यायाधीवक्ता कार्यालयबाट मुद्दा फिर्ता भएसँगै अब रवि लामिछानेलाई निर्वाचनमा उम्मेदवार हुन र प्रधानमन्त्री हुन बाटो खुल्ला भएको छ ।