सुशासनको धज्जी उडाउँदै आईजीपी सचिवालयका डीएसपी, घुमुवा खटाउँदै असुल्दै

काठमाडौं । सशस्त्र प्रहरी बलका महानिरीक्षकको सचिवालय मातहतको उजुरी छानबिन र अनुगमन शाखाका डीएसपी सुदीप रेग्मीले संगठनको छविमै आँच पुग्नेगरी बदनाम घुमुवालाई मधेश प्रदेशका जिल्लामा खटाएका छन् ।

राजु अर्याल सशस्त्र प्रहरी बलको महानिरीक्षक भएपछि मधेश र लुम्बिनी प्रदेशमातहतका जिल्लामा लामो समयदेखि कार्यरत घुमुवाहरुलाई बर्दीमा ड्युटी गर्नेगरी काठमाडौं, इलाम, झापा लगायतका जिल्लाका गणतिर सरुवा गरेका थिए । तर उनी आईजीपी भएको २ बर्ष नपुग्दै उनकै सचिवालयमा ३ बर्षदेखि कार्यरत डीएसपी सुदीप रेग्मीले तिनै तस्करका मतियार बदनाम घुमुवाहरुलाई मधेश प्रदेशका ८ वटा जिल्लामा सरुवा गराएका छन् । त्यस्ता बदनाम घुमुवालाई रेग्मीले तराईका बिभिन्न जिल्लामा असुलीमा परिचालन गरेको आरोप छ ।

सशस्त्रमा इन्स्पेक्टरदेखि माथिका अधिकृतको ६ महिनादेखि एक बर्षमा सरुवा हुन्छ । तर डीएसपी सुदीप रेग्मी भने ३ बर्षदेखि आईजीपी सचिवालयमा हालिमुहाली गर्दैआएका छन् । नेपाल प्रहरीकै जस्तो सशस्त्रमा पनि अनुगमन र उजुरी शाखा सकल दर्जाका पीरमर्का र गुनासा सुन्न स्थापना गरिएको हो । सकारात्मक हिसाबले स्थापना गरिएको सशस्त्रको अनुगमन शाखालाई डीएसपी रेग्मीले असुलीको अखाडा बनाएको आरोप छ । जसले आईजीपी अर्यालको समेत छविमा आँच पुगेको छ ।

सहायक हवल्दारहरु रोशन मिश्र, सन्तोष यादव र राजीव यादवलाई रेग्मीले मधेश प्रदेशका जिल्लाको तस्करीको संजालबाट असुलीका लागि खटाएको आरोप छ । रोशन मिश्रलाई रेग्मीले सर्लाहीमा खटाएका छन् । सशस्त्रमा जागिर खाएदेखि नै मिश्रले सर्लाही छाडेका छैनन् ।  सर्लाहीका एसपी देवीबहादुर चन्दमात्र होइन, मधेश प्रदेश(छिन्नमस्ता बाहिनी)का डीआईजी कृष्ण ढकालसँग समेत सेटिङ मिलाएर मिश्रले तस्करीको लाइन चलाउँदैआएका छन् ।

रोशन मिश्रकै सेटिङमा ब्यापारीहरु बिजय यादव, नवीन चौधरी, राजेश ठाकुरसहितका ब्यापारीले मधुवनी बीओपी हुँदै गएको जेठ १९ गते ६ गाडी चिनियाँ नास्पाती तस्करी गरी भारत पठाएका थिए । तर भारतीय अर्धसैनिक बल (एसएसबी) ले उक्त नास्पाती फर्काइदियो । भारतीय सीमापारी पुगेको नास्पाती नेपालतिरै फर्काएपछि तस्करीको पोल खुल्ने त्रासले रोशन मिश्रको डिजाइनमा स्थानीयलाई ढुंगामुढा गर्न लगाई हवाईफायर गरियो । र, सशस्त्र मुख्यालयका डीएसपी सुदीप रेग्मीले खटाएका घुमुवा रोशन मिश्रले छिन्नमस्ता बाहिनीका डीआईजी कृष्ण ढकालसँग समेत कुरा मिलाएर स्थानीयलाई आक्रमण गर्न लगाइएको र हवाई फायरिङ समेत गरी उक्त नास्पाती का ६ गाडी भारततर्फ भागेको विज्ञप्ति निकाली तस्करी प्रकरण ढाकछोप गरिएको रहस्य खुलेको छ ।

डीआईजी ढकालले तस्करीको नास्पाती भण्डारण गरिएको बलरा ५ का वडाध्यक्ष मनोज मोहनकुमार सिंहको भगवानपुरस्थित फर्निचर उद्योगमा छापा हान्न लगाएको दाबी गरेका थिए । तर भारत पुगिसकेको तस्करीको नास्पाती एसएसबीले फर्काएको सूचना सशस्त्र मुख्यालयदेखि गृहमन्त्रालयसम्म पुगेको छ । मुख्यालयबाट डीएसपी रेग्मीले खटाएका घुमुवा मिश्रकै सेटिङमा उक्त चिनियाँ नास्पाती भारत पुगेको र एसएसबीले फर्काएको थियो । तर डीएसपी रेग्मी र छिन्नमस्ता बाहिनीका डीआईजी कृष्ण ढकालले जेठ १९ गते अघिकै मितिदेखि रोशन मिश्र तालिममा रहेको देखाएर उनलाई उन्मुक्ति दिने तारतम्य मिलाएका छन् ।

चिनियाँ नास्पाती तस्करी भएर भारत पुगेको र एसएसबीले फर्काएको तथ्य खुलेपछि सशस्त्रको सर्लाहीमा सशस्त्रको १० नंं गणका एसपी देवीबहादुर चन्द र बलरा उधोरण अर्नाहा बीओपीका इन्चार्ज लोकेन्द्रबहादुर चन्द दुवैलाई कारबाही गर्न लागिएको थियो । तर गृहमन्त्री रमेश लेखकका स्वकीय सचिव जनक भट्टसँग हारगुहार गरेपछि उनीहरु कारबाहीबाट बचेका छन् ।

दर्जा सहायक हवल्दार भए पनि रोशन मिश्र जागिर खाएदेखि नै सर्लाहीमा कार्यरत छन् । उनको दरबन्दी झापा हो । मिश्रलाई मधेश प्रदेशका डीआईजीसँग कुरा गरेर घुमुवाका रुपमा खटाउने तारतम्य अनुगमनका डीएसपी रेग्मीले मिलाएको स्रोत बताउँछ । डीआईजी ढकाल र डीएसपी रेग्मी दुबै स्याङ्जाकै हुन् ।

मिश्रले नै डिआईजी ढकालदेखि एसपी, बीओपीका इन्चार्जलाई सेटिङ गरी तस्करीको लाइन दिएका थिए । मिश्रले सर्लाहीमा पछिल्लो पटक बिजय यादवको समूहलाई स्याउ र नास्पातीको तस्करीको लाइन दिएका थिए । मासिक ५ लाख बाहिनीमै बुझाउनेगरी उनले स्याउ र नास्पातीको तस्करीको लाइन दिएको आरोप छ । त्यसबाहेक कवाडी, ब्राजिलियन मकै(स्वट कर्न)को तस्करीको लाइन पनि उनले ब्यापारीलाई दिएका छन् । ब्राजिलियन मकै तेस्रो मुलुकबाट नेपालमा ल्याएर भारत तस्करी हुँदैआएको छ ।

मुख्यालयबाटै घुमुवा परिचालन

विगतमा अबैध असुली गरेको आरोपमा आईजीपी राजु अर्यालको परिपत्रको आधारमा तानिएका घुमुवालाई सशस्त्र प्रहरी मुख्यालयको अनुगमन शाखाका डीएसपी सुदीप रेग्मीले मधेश प्रदेशका ८ वटा जिल्लामा खटाएका छन् । सहायक हवल्दारहरु रोशन मिश्र, सन्तोष यादव र राजीव यादवलाई घुमुवाका रुपमा खटाइएको छ ।

सन्तोष यादव जागिर खाएदेखि महोत्तरीमा थिए । घुमुवा अप्रेसनमा २० नम्बर गण सिनामंगल काठमडौंमा सरुवा भएका थिए । डीएसपी रेग्मीले उनलाई तत्कालीन एसपी पूर्ण साउदलाई भनेर पशुपति मन्दिरमा ड्युटी खटाए । पशुपतिबाट एमसीसी परियोजनामा आकर्षक भत्ता पाउने गरी पठाए । दरबन्दी एमसीसीमा भत्ता खाने गरी मिलाएका रेग्मीले काम भने मधेशमा अनुगमनका नाममा असुलीमै पठाएको समाचार यसअघि नेपालफेसले नै उजागर गरेको थियो । एक महिनाअघि उनको सरुवा आफ्नै घर भएको जिल्ला १२ नम्बर गण बारामै भएको छ ।

बारामा रवाना लिएर प्रशासनमा बुझाएर एसपी खुमबहादुर केसीलाई भेटेपछि हाजिर भएको १ महिनाभन्दा बढीदेखि उनी गणमा नआएको स्रोत बताउँछ । उनी कहाँ खटिएका छन्, गणका एसपीबाहेक कसैलाई थाहा छैन । घरमै ब्यापारी बोलाउने, एसपीदेखि डीआईजी र मुख्यालयका डीएसपीसम्मको सेटिङमा आएको भनेर उनले तस्करीको लाइन चलाउन दररेट असुली गर्दैआएका छन् । बारामा दर्जाले सहायक हवल्दार भए पनि सन्तोष यादवलाई ब्यापारीले छायाँ एसपीको संज्ञा दिने गरेका छन् ।

राजीव यादवलाई पनि डीएसपी रेग्मीले प्रदेशको घुमुवाका रुपमा खटाएका छन् । उनको दरबन्दी प्राविधिक गण पथलैयामा हो । तर उनी ढुक्कले सशस्त्र मुख्यालयबाट खटिएको भन्दै मधेशका ८ वटै जिल्लामा तस्करहरुको नेटवर्क मिलाउन तल्लीन रहेका छन् । राजीव यादव पनि विगतमा घुमुवा अप्रेसनमा तानिएका थिए ।