आजदेखि काठमाडौंमा रविको बयान लिइने

काठमाडौं । कास्की, रुपन्देहीबाट अड्डासार गर्दै काठमाडौंमा ल्याइएका राष्ट्रिय स्वतन्त्र पार्टी (रास्वपा)का सभापति रवि लामिछानेको बयान आज सुरु हुँदैछ ।

बिहीबार साँझ पोखराबाट लामिछानेलाई काठमाडौंमा ल्याएर जिल्ला प्रहरी परिसर काठमाडौंको हिरासतमा राखिएको छ । सरकारी वकिलको कार्यालय काठमाडौंमा उनको बयान लिन लागिएको हो ।

स्वर्णलक्ष्मी सहकारी संस्थाको रकम अपचलनमा पनि दोषी देखिएको भन्दै उनलाई काठमाडौं जिल्ला अदालतले पक्राउ पुर्जी जारी गरेको थियो ।

स्वर्णलक्ष्मीबाट लामिछानेले व्यक्तिगत र जीबी राईसँग मिलेर ऋण लिएको पाइएको छ । पक्राउ पूर्जी जारी भएपछि कात्तिक २ गते काठमाडौंमा पक्राउ गरी उनलाई पोखरा र्पुयाइएको थियो ।
पछिल्लोपटक कास्की अदालतले लामिछानेमाथि म्यादथपका लागि १५ दिन हिरासतमा राखेर अनुसन्धान गर्न अनुमति दिएको छ ।

लामिछानेमाथि सहकारी ठगी, संगठित अपराध र सम्पत्ति शुद्धीकरणमा अनुसन्धान भइरहेको छ ।