रवि लामिछानेको मागः एकपटक बोल्न पाउनुपर्यो

काठमाडौं । उपप्रधान तथा गृहमन्त्री रवि लामिछानेले एकपटक संसदको रोष्ट्रममा उभिएर बोल्न पाउनुपर्ने माग दोहोर्याएका छन् ।

बिहीबार पनि नेपाली कांग्रेसले सहकारी ठगीमा संसदीय छानबिनको माग राखी सदन चल्न नदिएपछि गृहमन्त्री लामिछानेले सामाजिक संजालमा एकपटक बोल्न पाउनुपर्ने माग राखेका छन् । उनले लेखेका छन्–‘एक पटक बोल्न पाउनु पर्यो । त्यत्ति हो मागेको । यति घिनलाग्दो मिडिया ट्रायल ???’

जेठ १ गते नीति तथा कार्यक्रम प्रस्तुतिपछि राष्ट्रपति रामचन्द्र पौडेललाई धन्यवाद समेत दिन नदिई सदन अवरोध गरेको कांग्रेसले बिहीबार पनि संसद चल्न दिएको छैन । बिहान ११ बजेका लागि तय भएको प्रतिनिधिसभाको बैठक अपराह्न ४ बजे पनि सहमति हुन नसकेपछि सुचारु हुन सकेको छैन ।

कांग्रेसले सहकारी ठगीमा गृहमन्त्री लामिछानेमाथि संसदीय छानबिन समिति गठन गरी छानबिन गर्न माग राख्दै सदन चल्न नदिने स्पष्ट पारेको छ ।