३ सय ८४ रोपनी जग्गा निजीकरणको आरोपमा १८७ जनाविरुद्ध मुद्दा दायर

काठमाडौं। झापास्थित दमकको ३ सय ८४ रोपनी ८ आना जग्गा निजीकरण गरेको आरोपमा सरकारी कर्मचारीसहित १८७ जनाविरुद्ध विशेष अदालतमा भ्रष्टाचार मुद्दा परेको छ। अख्तियार दुरुपयोग अनुसन्धान आयोगले नापी कार्यालय चन्द्रगढीका ९ जना कर्मचारीसहित १८७ जनाविरुद्ध अदालतमा मुद्दा दायर गरेको हो ।

६५ जनाले साबिकको नापीमा सरकारी देखिएको जग्गालाई नयाँ नापी हुँदा ‘स्वबासी’ जनाएर निजीकरण गरेको अख्तियारको दाबी छ । आयोगले सुरु जग्गा दर्तावालाहरू केशावती पुरी सहित ६५ जनालाई प्रतिवादी कायम गरेको छ । जग्गा फिर्ता लिने प्रयोजनका लागी ११३ जनालाई प्रतिवादी बनाइएको आयोगले जनाएको छ ।

आयोगले नापी कार्यालय चन्द्रगढीका तत्कालीन प्रमुख नापी अधिकृत स्वर्गीय शशीकान्त झा सहित नौ जना कर्मचारीलाई प्रतिवादी बनाएको छ । आरोपीहरूले ३८४ रोपनी ८ आना जग्गा निजीकरण गरेको अख्तियारको दाबी छ । हिनामिना भएको जग्गाको न्यूनतम मूल्याङ्कन ४१ करोड ६२ लाख १९ हजार भन्दा धेरै हुने आयोगले जनाएको छ ।