अध्यागमन अधिकृत र कार्यालय प्रमुख हमालमाथि हातपात, विमानस्थलमा तनाव

काठमाडौं । त्रिभुवन अन्तर्राष्ट्रिय विमानस्थल अध्यागमन कार्यालयका प्रमुख गोगन हमाल र अध्यागमन अधिकृत छायाँलाल मोक्तानलाई एक सहायक प्रहरी निरीक्षक(असई)ले कुटपिट गरेका छन् । शुक्रबार अध्यागमन अधिकृत मोक्तानमाथि विमानस्थलमा कार्यरत असई संजय तामाङसहितका ४ जना प्रहरीले एक्कासी हातपात गरेका थिए ।

प्रहरीले विनाकारण आक्रमण गरेको बिषयमा उनले कार्यालय प्रमुख गोगन हमाललाई गुनासो गरेका थिए । सीसीटीभी फुटेज हेर्दा अधिकृतलाई विना गल्ती कुटपिट गरिएको भेटिएपछि कार्यालय प्रमुख हमालले असई तामाङलाई आक्रमण किन गरेको भनेर प्रश्न गरेका थिए । बिनाकारण अधिकृत मोक्तानलाई कुटपिट गरेको बिषयमा सोध्दा असई तामाङले उल्टै कार्यालय प्रमुख हमाललाई नै हातपात गरेका थिए ।

पछिल्लो समयमा विमानस्थल अध्यागमन र प्रहरीबीच भिजिट भिसामा यात्रु पठाएको बिषयले विवाद बढ्दै गएको छ । प्रहरीले भिजिट भिसामा कर्मचारीकै सेटिङमा बैदेशिक रोजगारीमा जाने गरेको आरोप लगाउँदैआएको छ । भिजिट भिसामा सेटिङ गर्ने अध्यागमन अधिकृत नरवीर खड्का पक्राृउ परिसकेका छन् । मुख्य सेटिङमा संलग्न अधिकृत विमल पौडेललाई भने प्रहरीले पक्राउ गर्नसकेको छैन ।