त्रिभुवन अन्तर्राष्ट्रिय विमानस्थलको यात्रु आवागमन अहिलेसम्मकै उच्च

काठमाडाैं। त्रिभुवन विमानस्थलमा अन्तर्राष्ट्रिय यात्रु आवागमन अहिलेसम्मकै उच्च विन्दुमा पुगेको छ। सो अनुसार विमानस्थलमा अन्तर्राष्ट्रिय यात्रु आवागमन ३०.१८ प्रतिशतले वृद्धि भएको स्रोतले जनाएको छ ।

सन् २०२३ मा ४५ लाख ४१ हजार १३७ जना यात्रुको आवागमन भएको त्रिभुवन अन्तर्राष्ट्रिय विमानस्थल कार्यालयले जनाएको छ ।

विमानस्थलका महाप्रबन्धक प्रतावबाबु तिवारीका अनुसार यो संख्या अहिलेसम्मकै उच्च हो । कोभिड महामारी शुरू हुनुभन्दा अगाडि २०१८ को भन्दा ४.५ प्रतिशतले वृद्धि भएको महाप्रबन्धक तिवारीले जानकारी दिए ।

उनका अनुसार अन्तर्राष्ट्रियतर्फ उडानको संख्या ३१ हजार ४६० रहेको छ । यो तथ्याङ्क गत वर्षको तुलनामा २९.४० प्रतिशतले बढी हो । तर कोभिड अगाडि सन् २०१८ को भन्दा १०.७६ ले कम रहेको विमानस्थल कार्यालयले जनाएको छ ।

यस्तै, आन्तरिकतर्फ यात्रु आवागमन तथा उडान अवतरण घटेको छ भने कार्गो आवागमनमा गत वर्षको तुलनामा वृद्धि भएको छ ।

यात्रु आवागमन ४१ लाख ५० हजार ३२६ (गत वर्षको तुलनामा ७.०७ प्रतिशतले कमी), उडान अवतरण ९६ हजार ९८९ (गत वर्षको तुलनामा १०.३६ प्रतिशतले कम) रहेको छ ।

यस्तै, कार्गो आवागमन ३ हजार ४२६ दशमलव ८६१ टन रहको छ।

यो संख्या गत वर्षको तुलनामा १०.८७ प्रतिशतले बढेको विमानस्थल कार्यालयले जनाएको छ ।