दुबई पठाइदिन्छु भन्‍दै ९ लाख ठगी आरोपमा एक जना पक्राउ

काठमाडौं। दुबई पठाइदिन्छु भन्‍दै ९ लाख ५० हजार रुपैयाँ ठगी गरेको आरोपमा एक जना पक्राउ परेका छन् । काठमाडौं उपत्यका अपराध अनुसन्धान कार्यालयको टोलीले नयाँ बानेश्वरबाट उनलाई पक्राउ गरेको हो ।

पक्राउ पर्नेमा काभ्रेपलाञ्चोकको चौरीदेउराली गाउँपालिका-६ घर भई हाल काठमाडौको बुढानीलकण्ठ नगरपालिका-१० कपन आकाशेधारा बस्‍ने २९ वर्षीय उमेश रिमाल रहेका छन् ।

पक्राउ परेका उनलाई थप अनुसन्धान तथा कारबाहीको लागि वैदेशिक रोजगार विभाग बुद्धनगर पठाइएको प्रहरीले जनाएको छ । उनले १७ जना पीडितलाई वैदेशिक रोजगारीमा पठाइदिन्छु भन्‍दै प्रतिव्‍यक्ति २ लाखका दरले रकम उठाएर सम्पर्कविहीन भएको प्रहरीको आरोप छ ।