झापामा केपी ओलीमाथि ढुंगामुढाको प्रयास

काठमाडौं । पुर्वप्रधानमन्त्री एवं नेकपा (एमाले)का अध्यक्ष केपी शर्मा ओलीमाथि अभद्र व्यवहार तथा आक्रमणको प्रयास भएको छ । अध्यक्ष ओली झापाको बुधबारेको कार्यक्रममा सहभागी हुन जाँदा कार्यक्रमस्थल बाहिर होहल्ला भएको हो । आजको प्रतिनिधि सभा बैठकमा एमाले प्रमुख सचेतक पदम गिरीले आज झापामा कार्यक्रमस्थलबाहिरबाट कार्यक्रम भंग गर्ने प्रयास भएको बताए ।

“काठमाडौंबाट झापातर्फ जाँदै गर्दा भद्रपुर विमानस्थलबाट कार्यक्रमस्थल बुधबारे जाने क्रममा कार्यक्रमस्थलबाहिरपट्टि बसेर होहल्ला गर्ने, कार्यक्रम विथोल्न खोज्ने, शान्ति भंग गराउन खोज्ने काम भएको छ,” उनले भने ।

उनले एमालेको सत्तापक्षको कार्यकर्ताको सहभागितामा प्रतिपक्षलाई जिस्क्याइएको बताए ।

“एमालेको नेतृत्व एउटा कार्यक्रममा सहभागी हुन जाँदा जुन प्रकारले ढुंगामुढा गर्ने कोसिस गरिन्छ, अनेकन ढंगले कार्यक्रम भाँड्ने कोसिस गरिन्छ,” गिरीले भने, “सत्तापक्षकै कार्यकर्ता त्यसमा घुसपैठ गरिन्छ ।”