निवर्तमान मेयरसहित १ सय जनाले त्यागे लोसपा, एमालेमा प्रवेश गर्ने तयारी

काठमाडौं । स्थानिय निकाय निर्वाचन सकिएसंगै बिभिन्न पार्टीहरुमा भएको अन्तर्घात र वादविवादको प्रभाव बाहिर आउन थालेको छ । 

माउ पार्टीमाथि विभिन्न आरोप लगाउँदै आज रौटहटको गौर नगरपालिकाका निवर्तमान मेयर अजय कुमार गुप्ता सहित करिब एकसय जनाले पार्टी परित्याग गरेका छन् ।

लोकतान्त्रिक समाजवादी पार्टी नेपाल (लोसपा)बाट मेयर पदका प्रत्यासि रहेका गुप्ताले पार्टी नेता तथा सोहि क्षेत्रबाट प्रतिनिधिसभा सदस्य रहेका अनिल कुमार झाले असहयोगि भुमिका खेलेको भन्दै उनिहरुले पार्टी परित्याग गरेको जनाएका छन् ।

रौतहटको सदरमुकाम गौरमा पत्रकार सम्मेलनगरी ती नेता कार्यकर्ताहरुले औपचारिक रूपमा पार्टी परित्यागको घोषणा गरेका हुन् ।

उनिहरुले सांसद झा र प्रदेश सांसद बाबुलाल साह कानुले गएको स्थानीय तहको निर्वाचनमा असहयोगी भूमिका निर्वाह गरेको र प्रतिपक्षिलाई सहयोग पुर्याएको आरोप लगाएका हुन् ।

पार्टी परित्याग गर्नेमा गौर नगरपालिकाका निवर्तमान मेयर गुप्ता, उपमेयरकी प्रत्यासी उषा झा, वडा नम्बर ५ का पूर्व अध्यक्ष रामस्वार्थ यादव, वडा नम्बर ९ का पूर्वअध्यक्ष राजेश सिंह, वडा सदस्य भैरो महतो, बैजनाथ महतो लगायत छन् । 

पार्टी परित्याग गरेका नेता कार्यकर्ताहरुले नेकपा एमालेमा प्रवेश गर्ने तथारी थालेको बुझिएको छ । पुर्व मेयर गुप्ताले एमाले अध्यक्ष केपि शर्मा ओलिलाई काठमाडौंमा भेट समेत गरेका छन् ।