१ लाख ३२ हजार घुससहित समातिएका दास र यादवबिरुद्ध मुद्दा दायर

काठमाडौं । एक लाख ३२ हजार ३ सय ५० रूपैयाँसहित पक्राउ परेका सप्तरीको राजविराज नगरपालिका वडा नं. ३ स्थित भेटेरनरी अस्पताल तथा पशु सेवा विज्ञ केन्द्रका कार्यालय प्रमुख डा. रामपवित्र दास र हलुका सवारी चालक भोगेन्द्र यादवका बिरुद्ध अख्तियार दुरुपयोग अनुसन्धान आयोगले बुधबार बिशेष अदालतमा मुद्दा दायर गरेको छ ।

भेटेरनरी अस्पताल तथा पशु सेवा विज्ञ केन्द्रका कार्यालय प्रमुख डा. रामपवित्र दास र सवारी चालक यादवले भ्याक्सिनेटरहरूबाट सेवा उपलब्ध गराए बापतको पाउनुपर्ने भुक्तानी रकमको २० प्रतिशत कमिसन स्वरूप घुस माग गरेको उजुरीपछि अख्तियारको इटहरी कार्यालयबाट खटिएको टोलीले उनीहरुलाई नियन्त्रणमा लिएको थियो । घुस लिइसकेपछि उनीहरुलाई नियन्त्रणमा लिएको थियो ।

भेटेरिनरी अस्पताल तथा पशु सेवा विज्ञ केन्द्र, राजविराजका कार्यालय प्रमुख दासले आफ्नो कार्यालय प्रमुख ओहदा एवं सोसम्बन्धी जिम्मेवारीमा रहेका बखत आफ्नो कार्यालयबाट सेवा दिनुपर्ने कृषकहरूका पशु चौपायाहरूलाई खोप कार्यक्रम सम्पन्न गर्न भ्याक्सिनेटरहरू नियुक्ति दिएकोमा खोप कार्यक्रम सम्पन्न गरेपश्चात् कानुन बमोजिम पाउनुपर्ने पारिश्रमिक रकम भुक्तानी दिए दिन लगाएबापत सवारी चालक भोगेन्द्र यादवसँगको मिलेमतो तथा योजनामा भुक्तानी रकमको कम्तीमा २० प्रतिशत रकम घुस माग्ने गरेको उजुरी आयोगमा परेको थियो ।

आयोगमा परेको उजुरीपछि खटिएको टोलीले दास र यादवलाई २३ असार २०५३ मा पक्राउ गरेको थियो ।
उनीहरु दुबै जनालाई बिगोबमोजिम जरिवाना सजायको मागदाबी गरी मुद्दा दायर गरिएको अख्तियारका प्रवक्ता सुरेश न्यौपानेले जारी गरेको विज्ञप्तिमा उल्लेख छ ।