हरिबोल गजुरेल र पूर्वमुख्यमन्त्री केसीसहित सातजना नेता नेकपाबाट निस्कासित

काठमाडौं । पार्टीको निर्णय र निर्देशनविपरीत उम्मेदवारी दिने र तिनका प्रस्तावक र समर्थक बस्ने नेपाली कम्युनिष्ट पार्टीले सातजना नेता तथा कार्यकर्तालाई पार्टीबाट निस्कासन गरेको छ ।

आगामी फागुन २१ गते हुने आमनिर्वाचनका लागि पार्टीका आधिकारिक उम्मेदवार रहेका निर्वाचन क्षेत्रमा पार्टीको निर्णयविपरीत उम्मेदवार बनेका तथा त्यस्ता उम्मेदवारका प्रस्तावक, समर्थक र प्रचारकको भूमिकामा रहेका व्यक्तिलाई पार्टी विधानको दफा १०६ अनुसार अनुशासनात्मक कारबाही गर्दै निस्कासन गरिएको पार्टीले जनाएको छ ।

पार्टीबाट निस्कासनमा पर्नेहरूमा सिन्धुलीका हरिबोल गजुरेल, महेश्वर दाहाल, दाङ क्षेत्र नं. ४ का कुलप्रसाद केसी, उदयपुरका मेजर राई, सिरहाका धर्मनाथ साह, राजकुमारी साह र जिवछ साह रहेका छन् ।

हरिबोल गजुरेल तत्कालीन माओवादी केन्द्रका बरिष्ठ नेता र पुष्पकमल दाहाल ‘प्रचण्ड’ प्रधानमन्त्री हुँदा उनका राजनीतिक सल्लाहकार थिए । सिन्धुली क्षेत्र नम्बर २ मा नेकपाका उम्मेदवार लेखनाथ दाहाल‘राजन’बिरुद्ध बागी उम्मेदवारी दिएका महेश्वर दाहाललाई समर्थन गरेबापत गजुरेल निस्कासित भएका हुन् ।

दाङ क्षेत्र नम्बर १ मा नेकपाका उम्मेदवार मेटमणि चौधरीका बिरुद्ध उम्मेदवारी दिएका लुम्बिनी प्रदेशका मुख्यमन्त्री कुलप्रसाद केसी सोनामलाप्ई पनि पार्टीबाट निस्कासित गरिएको छ ।

पार्टी सह–संयोजक माधवकुमार नेपाल र संयोजक पुष्पकमल दाहाल प्रचण्डद्वारा जारी विज्ञप्तिमा पार्टीको निर्णयविपरीत गतिविधि स्वीकार्य नहुने उल्लेख गरिएको छ ।

को को भए निस्कासित ?