बालेनका प्रहरीले नदेखेको डिल्लीबजारको यो अवैध भवन, नक्सा र पूर्जाबिना कब्जा

शारदादेवी सापकोटा

काठमाडौं । मालपोत कार्यालय डिल्लीबजारसँगै बनेको नेपाल लेखापढी व्यवसायी संघको भवन न त नक्सा पास नै गरिएको छ नत लिज सम्झौता नै । मालपोतका नाममा प्रमाण पूर्जा रहेको यो भवन जबर्जस्त रुपमा लेखापढी व्यवसायीले आफ्नो कब्जामा लिएको मालपोत स्रोतले बताएको छ ।

भवन कब्जा गरी इकाई कार्यालय र केन्द्रीय कार्यालय सञ्चालन गरिएको छ । मालपोत कार्यालयमा भएका अनियमितता र घुसको कारण लेखापढी व्यवसायीहरु नै भएको भन्दै पटक–पटक भूमि व्यवस्था सहकारी तथा गरिबी निवारण मन्त्रीले मन्त्री हुनेबित्तिकै मालपोत परिसरबाट हटाउने घोषणा गर्छन् । तर, राजनीतिक दबाबका कारण असफल भएपछि सम्झौता गर्दै आएका छन् ।

नेकपाको बहुमतको सरकारको शक्तिशाली मन्त्री बनेकी पदमा अर्यालले पनि मालपोत परिसरबाट लेखापढी ब्यवसायीहरुलाई १५ दिनभित्र हटाउने उद्घोष गरेकी थिइन् ।
मालपोत कार्यालयको भवन बनाउँदा नै यो भवन पनि बनाइएको बताइन्छ । यो भवनका विषयमा लेखापढी व्यवसायी संघ इकाई कार्यालय डिल्लीबजारका लोकनाथ अधिकारीसँग सम्पर्क गर्दा सफल हुन सकेन ।

सचिव भरत खड्कासँग सम्पर्क गर्दा उनले आफूलाई यो विषयमा केही पनि थाहा नभएको बताए । उनले यो विषयमा केन्द्रीय महासचिवलाई सोध्न आग्रह गरे । लेखापढी व्यवसायी संघका केन्द्रीय महासचिव हरिप्रसाद पौडेललाई सम्पर्क गर्दा उनले सुरुमा मन्त्रालयले भोगाधिकार दिएको भन्दै झुटो बोले ।

सरकारी जग्गाको भोगाधिकार मन्त्रीपरिषद्ले मात्रै दिनसक्छ, कसरी मन्त्रालयबाट पाउनु भयो भनी प्रश्न गर्दा उनले अध्यक्ष सीताराम दाहालसँग सोध्न आग्रह गरे । शुक्रबार सम्पर्क गर्दा आइतवार मन्त्रालयले भोगाधिकार दिएको पत्र देखाउने बताएका अध्यक्ष दाहालले आइतवार भने महासचिवलाई देखाएर बैठकमा छु भन्दै पन्छिएका छन् ।

दाहालसँग सम्पर्क गर्दा हिजो आइतवार पुनः महासचिव हरिप्रसाद पौडेलसँग सम्पर्क गर्न आग्रह गरे । भूमि व्यवस्था, सहकारी तथा गरिबी निवारण मन्त्रालयका प्रवक्ता तथा सहसचिव गणेशप्रसाद भट्टसँग सम्पर्क गर्दा उनले आफूले सत्यतथ्य बुझेर जानकारी दिने बताए पनि पछि सम्पर्कमा आएनन् ।

भूमिसुधार अधिकारी हुँदा कतिपयले सरकारी जग्गा कौडीको मोलमा लिजमा दिँदै आएका छन् । काठमाडौंंका तत्कालीन भूमिसुधार अधिकारी लुम्बप्रसाद शिवाकोटीले थापाथलीको प्राइम ठाउँमा रहेको जग्गा नर्भिक अस्पताललाई कौडीको मोलमा दिएर राम्रै शुभलाभ प्राप्त गरेको आरोप छ । सेवानिवृत्त भएपछि शिवाकोटी हाल कानूनी सेवा केन्द्र खोलेर बसेका छन् । डायरी एक्सप्रेस साप्ताहिकबाट साभार