नेपाल ट्रष्टको जग्गा लिज प्रकरण : पूर्वसचिव अर्जुन कार्की पक्राउ

काठमाडौं । दरबारमार्गस्थित नेपाल ट्रष्टको कार्यालय र थामसेर्कु ट्रेकिङ प्रा. लि. को बीचमा जग्गा लिजमा दिने र लिने करार सम्झौता दीर्घकालीन हानी नोक्सानी पुर्याएकोमा पूर्वसचिव अर्जुनकुमार कार्कीलाई नेपाल प्रहरीको केन्द्रीय अनुसन्धान ब्यूरो(सीआईबी)ले पक्राउ गरेको छ ।

नेपाल ट्रष्टलाई गैरकानूनी तवरले लाभ लिई ठगी, आपराधिक विश्वासघात गरेको अभियोगमा कार्कीलाई सीआईबीले आइतबार पक्राउ गरेको हो ।

नेपाल ट्रष्टको जग्गा थामसेर्कुलाई लिजमा दिंदा उल्लेख भएको कित्ता नं ४६०६ को जग्गा भन्दा बढी अर्को कि.नं ४६०५ समेत थप गरी लिजमा दिने र लिने सम्बन्धमा बदनियतपूर्वक नेपाल ट्रष्टको नाममा रहेको जग्गा बुट मोडलको निमित्त निर्माण अवधि ३ वर्ष समेत ३० बर्षको लागि लिजमा दिनेर लिने सम्झौता गरी नेपाल ट्रष्टको कार्यालयलाई दीर्घकालीन हानीनोक्सानी हुनेगरी सम्झौता गरेको आरोपमा कार्की पक्राउ परेका हुन् ।

ठगी, आपराधिक विश्वासघात सम्बन्धी कसूरको अनुसन्धानको सिलसिलामा उक्त करार संझौता गर्ने कार्यमा संलग्न रहेका तत्कालिन सहसचिव लेखबहादुर कार्कीलाई कात्तिक २१ गते सीआईबीले पक्राउ गरिसकेको छ ।

लेखबहादुर कार्कीमाथि अनुसन्धान हुँदै जाँदा अर्जुनकुमार कार्कीको समेत संलग्नता रहेको खुल्न आएकोले पक्राउ गरिएको सीआईबीले जनाएको छ ।