रौतहटको चिनीकाण्ड, तनावमा परेका डीआईजी २ एसपीसहित अचानक ठोरीमा ?

काठमाडौं । रौतहटको गरुडा नगरपालिका, शिवनगरमा गएको साउन २९ गते बरामद भएको ८ सय ४० बोरा चिनीमध्ये १ सय २० बोरामात्र भन्सारमा बुझाएको र ७२० बोरा गायब पारिएको बिषयमा सशस्त्र प्रहरीका एक एसपी, दुई डीएसपीसहित छानबिनमा तानिइसकेका छन् । रौतहटको ११ नम्बर गणका एसपी सन्तोष बस्नेतको ठाउँमा त रामहरि अधिकारीलाई खटाइसकिएको छ ।

गौर गुल्मका डीएसपी अमर लामा र सन्तपुर बेसका डिएसपी राजेन्द्र बस्नेतसहितका सई, इन्स्पेक्टर र अरु प्रहरीमाथि छानबिन भइरहेको छ । चिनी गायब र त्यसपछि तल्लो तहदेखि एसपीसम्म तानिएपछि छिन्नमस्ता बाहिनी मधेश प्रदेशका डीआईजी कृष्ण ढकाल तनावमा परेका छन् । छानबिनमा परेकाहरुको बयानका आधारमा उनीसमेत तानिने संभावना देखिएपछि उनी तनावमा परेका हुन् ।

त्यही तनावका बीचमा डीआईजी ढकाल र १२ नम्बर गण बाराका गणपति खुमबहादुर केसी र १३ नम्बर गणका एसपी पुरन चन्द भट्टलाई लिएर शुक्रबार पर्साको ठोरी गएका थिए । दुई एसपीलाई लिएर ठोरीको बीओपीमा रात बिताएका थिए । ठोरीको बीओपीमा सशस्त्रका उच्च अधिकारीसमेत बस्न मिल्नेगरी निर्माण गरिएको छ ।

रौतहटको शिवनगरमा तस्करीको चिनी बरामद गर्न आईजीपी राजु अर्यालले निर्देशन दिएको तर पछि डबल स्ट्यान्डर्ड देखाइएको भन्दै ढकालले रोष प्रकट गरेको स्रोत बताउँछ । सशस्त्र मुख्यालयदेखि छिन्नमस्ताले समेत प्रदेशमा परिचालन गरेका घुमुवा सहायक हवल्दार रोशन मिश्र र हवल्दार राजीव यादवमार्फत् चिनी बरामद गर्न लगाइएको तर पछि एकपछि अर्को गरी कारबाही गरिएकोमा उनी रुष्ट छन् । आफूसमेत छानबिनमा तानिने भएपछि उनले डबल स्ट्यान्डर्ड देखाएको भन्दै गुनासो गरेको स्रोत बताउँछ ।

आईजीपीका विश्वासपात्रलाई प्रयोग गरी चिनी बरामद गर्न लगाइयो, बरामद भएपछि उल्टै आफ्नो समेत बदनाम गरिएकोमा ढकाल रुष्ट भएको बताइन्छ । शुक्रबार अबेर रातसम्म खानपिन गरी ठोरीको बीओपीमा बसेका ढकाल शनिबार काठमाडौं आइसकेका छन् ।