ठमेलको दोहोरीमा विवाद र कुटपीट, गुण्डानाइके युवराज गुरुङ पक्राउ

काठमाडौं । ठमेलको नगरकोट दोहोरी साँझमा विवाद र कुटपीटमा संलग्न रहेको आरोपमा कुख्यात ‘गुन्डा नाइके’ सानुभाइका नामले चिनिने युवराज गुरुङ पक्राउ परेका छन् ।

जिल्ला प्रहरी परिसर काठमाडौंको टोलीले बुधबार राति भएको कुटपिटपछि गुरुङलाई नियन्त्रणमा लिइएको हो ।

गुरुङ ठमेल क्षेत्रमा लामो समयदेखि अपराधिक गतिविधिमा संलग्न रहँदै आएका छन् । सोही क्रममा नगरकोट दोहोरी साँझमा उनको समूहले ले विवाद चर्काएपछि स्थानीयको सूचनाका आधारमा प्रहरी पुगेको थियो ।

त्यसक्रममा सानुभाइलाई पक्राउ गरिएको प्रहरीले जनाएको छ । हाल उनलाई थप अनुसन्धानका लागि प्रहरी हिरासतमा राखिएको छ ।

गुरुङमाथि यसअघि पनि विभिन्न आपराधिक गतिविधिमा संलग्न रहेको आरोप लाग्दै आएको छ । यस्तै २०८० सालको माघमा पनि ठमेलस्थित छायाँ सेन्टरको पार्किङमा गुरुङसहितको समूहले एक पुरूषमाथि कुटपिट गरेको थियो ।

सानुभाइसहित ७ जनाविरुद्ध प्रहरी वृत्त दरबारमार्गमा ज्यान मार्ने उद्योगको कसुरमा किटानी जाहेरी परेको थियो ।

उनी त्यसभन्दा अगाडि २०८० सालको असारमा ओम्निया क्लबमा सञ्चालक राजेन्द्र गुरुङसहित केही कर्मचारीहरुलाई कुटपिट गरेको आरोपमा पक्राउ परी १० हजार धरौटीमा छुटेका थिए ।
उनको समूहले ठमेलको नाइट क्लब ओम्नियामा प्रवेश गरेर सञ्चालक राजेन्द्र गुरुङ र बाउन्सरलाई कुटपिट गरेको थियो ।

सानुभाइ प्रहरी इन्काउन्टरमा मारिएका गुण्डा नाइके कुमार घैंटेका समूहका व्यक्ति हुन् । उनी घैंटेको मुख्य सहयोगी भएर काम गर्थे । घैंटेको इन्काउन्टर भएपछि असुरक्षित मान्दै बुलेटप्रुफ ज्याकेट लगाएर हिंड्ने गरेका गुरुङइलाई प्रहरीले २०७२ सालमा पक्राउ गरेको थियो । त्यतिबेला उनको साथबाट पेस्तोल र गोलीसमेत बरामद भएको थियो ।

सानोभाइले २०६७ सालमा नुवाकोटका निर्माण व्यवसायी अनिल श्रेष्ठलाई हप्ता असुली नदिएको भन्दै गोली प्रहार गरेका थिए । नुवाकोटकै होटल व्यवसायी सुरेश डंगोललाई पनि उनले आक्रमण गरेका थिए ।