एमालेको प्रदर्शनमा तरबार र ढाल प्रदर्शन

काठमाडौं । प्रधानमन्त्री केपी शर्मा ओलीले काठमाडौंमा राजावादीको प्रदर्शनलाई नियन्त्रणमा लिन नेकपा (एमाले)का कार्यकर्तालाई निर्देशन दिएका थिए । सो निर्देशन पालना गर्दै एमाले आज तरबार र ढालसहित प्रदर्शनमा उत्रिएको छ ।

गणतन्त्र दिवसलाई उत्सवमय रुपमा मनाउन भन्दै एमाले नेता कार्यकर्ताहरुले प्रतिकात्मक तरबार र ढालसहित प्रदर्शन गरेका हुन् ।

सुदूरपश्चिम कमिटीले निकालेको र्यालीमा तरबार र ढाल प्रदर्शन गरिएको हो । यो र्यालीको अग्रपंक्तिमा एमाले सचिव लेखराज भट्ट लगायतका नेताहरु छन् । उनीहरुले गणतन्त्र जिन्दावाद, नेकपा एमाले जिन्दावाद लगायतका नारा लगाएका छन् ।

प्रदर्शनमा एमाले नेताकार्यकर्ताहरु साँस्कृतिक झाँकीसहित सहभागी छन् । काठमाडौंका विभिन्न ठाउँबाट निकालिएका र्याली भद्रकाली, शहीदगेट, बीर अस्पताल, रत्नपार्क हुँदै पुनः भृकुटीमण्डपमा आएर कोण सभामा परिणत भएको छ ।