बिनोद चौधरी र उमेश श्रेष्ठलाई सुम्पिन लागेका किमाथांका र मुगु–कर्णाली आयोजनाको टेण्डर रद्द

काठमाडौं । सरकारी स्वामित्वको विद्युत् उत्पादन कम्पनी लिमिटेडले साढे ५ खर्ब लागतका २ जलविद्युत आयोजना निर्माणका लागि लगानी जुटाउने भनेर गरेको टेण्डर रद्द गरेको छ ।

ऊर्जामन्त्री दीपक खड्काले सरकारले ठूलो रकम खर्च गरिसकेका अरुण किमाथांका र मुगु–कर्णाली आयोजना ब्यापारी तथा कांग्रेस सांसद बिनोद चौधरी, कांग्रेसका कोषाध्यक्ष उमेश श्रेष्ठ र मेडिकल ब्यवसायी तथा सांसद सुनिल शर्मालाई सुम्पनेगरी टेण्डर आह्वान गरेका थिए । नीतिगत भ्रष्टाचारमा कीर्तिमान कायम गरेको केपी शर्मा ओली सरकारले खरबौंंका यी आयोजना कौडीको मूल्यमा ब्यापारीलाई सुम्पिन लागेको संचारमाध्यमले उजागर गरेपछि ऊर्जामन्त्री खड्काले टेण्डर रद्द गर्न बाध्य भएका छन् ।

गत मंसिर २३ गते राष्ट्रिय दैनिक पत्रिकामा सूचना प्रकाशित गरेको वित्तीय लगानी आह्वान गरेको २ जलविद्युत् आयोजनाको आशयपत्रसम्बन्धी प्रक्रिया रद्द गरेको हो । कम्पनीले किमाथांका अरुण जलविद्युत् आयोजना र मुगु कर्णाली जलाशययुक्त जलविद्युत् आयोजना निर्माणका लागि लगानी जुटाउने बहानामा कौडीको मूल्यमा ब्यापारीलाई सुम्पनेगरी टेण्डर आह्वान गरेको थियो । बिहीबार बसेको विद्युत् उत्पादन कम्पनी लिमिटेडको संचालक समितिले उक्त प्रक्रिया रद्द गर्ने निर्णय गरेको हो ।

सरकारले किमाथांका अरुण जलविद्युत आयोजना र मुगु कर्णाली जलासययुक्त जलविद्युत आयोजना सार्वजनिक निजी साझेदारी ढाँचामा  निमार्णका लागि लगानी जुटाउन  गत मंसिर २३ गते राष्ट्रिय दैनिक पत्रिकामा सूचना प्रकाशित गरेर वित्तीय लगानी आह्वान गरेको थियो । यी २ आयोजनाको विद्युत उत्पादन कुल क्षमता २३ सय ५६ मेगावाट रहेको छ । आयोजना निमार्णका लागि ५ खर्ब ५३ अर्ब ८० करोड रुपैयाँ लाग्ने अनुमान गरिएको छ ।

किमाथांका अरुण अर्धजलासय आयोजनाको विद्युत उत्पादन क्षमता ४ सय ५४ मेगावट रहेको र मुगु कर्णाली जलासययुक्त जलविद्युत आयोजनाको विद्युत उत्पादन क्षमता १९ सय २ मेगावाट रहेको छ ।  यी २ आयोजना बनाउन ५ खर्ब ५३ अर्ब ८० करोड रुपैयाँ लाग्ने अनुमान गरिएको हो ।