लाइफलाइन सडक अलपत्र, सडकका डीजी पोखरेल विदेश भ्रमणमा मस्त

काठमाडौं । सडक विभागले संचालन गरिरहेका देशकै लाइफलाइन सडक मानिएका सबै योजनाहरू यतिबेला अलपत्र अवस्थामा छन् । तर विभागका महानिर्देशक रामहरि पोखरेललाई यो विषयले छोएको छैन । उनी भने विदेश भ्रमणमा मस्त छन् । विभागको इतिहासमै पोखरेल कमजोर महानिर्देशकको रूपमा चिनिएका छन् । उनले दिएको निर्देशनलाई विभाग मातहतकै कर्मचारीहरुले टेर्दैनन् ।

विभागमा अक्षम भनेर चिनिएका महानिर्देशक पोखरेल विदेश भ्रमण्मा तल्लीन छन् । आर्थिक वर्ष सकिनु भन्दा करिब १५ दिनअघि पोखरेल विभागको महानिर्देशकको कुर्सीमा पदभार ग्रहण गरेका थिए । सामान्यतया आर्थिक वर्ष सकिनु भन्दा १५ दिनअघि महानिर्देशक सरुवा गरिंदैन । तर उनको हकमा भने विगतको सबै परम्परा तोडियो । प्रधानमन्त्री केपी शर्मा ओलीसँग उनको निकट सम्बन्ध छ । यही सम्बन्धका आधारमा पोखरेल विभागको महानिर्देशक भएका हुन् । उनी महानिर्देशक हुँदा भौतिक पूर्वाधार तथा यातायात मन्त्री रघुवीर महासेठ थिए । महासेठले आर्थिक बर्ष समाप्त हुने १५ दिनअघि पोखरेललाई पठाएर तत्कालीन महानिर्देशक सुशीलबाबु ढकालमाथि अन्याय गरेका थिए ।

विभागका एक कर्मचरी भन्छन्–‘परम्परा विगार्ने काम स्वयम् पोखरेलले गर्नुभएको हो ।’ महानिर्देशक भएयता पोखरेलले थाइल्याण्ड, कोरिया लगायतका देशको भ्रमण गरिसकेका छन् । कात्तिकको तेस्रो हप्ता थाइल्याण्ड र मंसिरको दोस्रो हप्ता कोरिया पुगिसकेका छन् । उनी दुबै देशमा एक-एक हप्ता बसेका थिए ।

देशकै लाइफलाइन सडक नारायणघाट–बुटवल, मुगलिङ–पोखरा–नागढुंगा–नौविसे, नौविसे–मलेखु सडक अलपत्र अवस्थामा छन् । यी सडक देशका लागि निकै दूरगामी महत्वका सडक हुन् । यी सबै सडक अलपत्रझैं छन्, काम ठप्प छन् । सडकभरी जहाँतहीँ खनिएको छ । खाल्डाखुल्डीमात्र छन् । यात्रुहरू र सवारी साधनले निकै सास्ती भोगिरहनुपरेको छ । सडक अलपत्र हुँदा सवारी दुर्घटना बढेको बढ्यै छ ।

काम अघि बढाउन पोखरेलले चासो राखेका छैनन् । बीपी राजमार्गको पुननिर्माण कहिले हुन्छ, यसको टुगो लागेको छैन । आगामी वर्षायाममा पनि बीपी राजमार्गको पुननिर्माण नहुने निश्चितझैं भएको छ । यस विषयमा पनि पोखरेलाई मतलब छैन । यता ठेकेदारहरूले सम्पन्न भएका आयोजनाको भुक्तानी पाउन सकेका छैनन् । ३ अर्ब रुपैयाँ अझै ठेकेदारहरुले पाउन सकेका छैनन् । समयमा पैसा नपाउँदा ठेकेदारहरु विचल्लीमा परेका छन् । यस विषयमा पनि पोखरेलले चासो राखेका छैनन् । ठेकेदारहरुलाई पैसा दिलाउन पोखरेलले काम अघि बढाएका छैनन् । ‘यी सबै कारणहरुले महनिर्देशकज्यू पूर्णरूपमा असफल सावित हुनुभएको छ’ विभागका एक उच्च कर्मचारी भन्छन्–‘उहाँकै कारण विभाग बद्नाम हुने स्थितिमा पुगेको छ ।’

पोखरेल महानिर्देशक हुुनुभन्दा पहिले विभागकै उपमहानिर्देशक तथा योजना महाशाखाका प्रमुख थिए । त्यो पनि विभागको आकर्षक ठाउँ हो । उनले १५ दिनसम्म धैर्य राख्न सकेनन् । आर्थिक वर्ष सकिनु भन्दा १५ दिनअघि नै महानिर्देशकको कुर्सीमा बस्न उनलाई हतार भयो । यसकै परिणाम विभागले अहिले भोगिरहेको छ ।
े