आईजीपीको नाम लिंदै सिपाहीको कोषमा डीएसपी गैरेले किन लगाए बक्रदृष्टि ?

काठमाडौं । सशस्त्र प्रहरी बल नेपाल सांस्कृतिक तथा बाद्यबादन गुल्मको कमाण्ड सम्हालेको छोटो समयमै डीएसपी सुरेश गैरेले आर्थिक अनियमिततामा लागेका छन् । सो गुल्ममा कार्यरत कर्मचारीहरुले युएन मिसनबाट फर्केपछि ५ सय रुपैयाँ जम्मा गरी अक्षयकोष खडा गरेका छन् ।

सो कोष तत्कालीन डीएसपी कुलबहादुर थापाको पालामा खडा गरिएको थियो । उक्त गुल्ममा कार्यरत सशस्त्र प्रहरी बलका कर्मचारीलाई आर्थिक सहयोग(सापटी) दिने उद्देश्यले कोष खडा गरिएको थियो । सो कोषमा जम्मा भएको करिब १ लाख ५० हजार रुपैयाँ कसरी ब्यवस्थापन गर्ने भनेर तत्कालीन कमाण्डर डीएसपी दलप्रसाद काफ्लेले सो गुल्ममा कार्यरत इन्स्पेक्टरको कमाण्डमा समिति बनाएका थिए । समिति बनाई सो रकम रकमको ब्यवस्थापन गर्नका लागि राय मागेका थिए । सो समिति ले गरेको छलफलअनुुसार गुल्ममा कार्यरत सम्पूर्ण कर्मचारीका लागि ट्रयाकसुट खरिद गरी बितरण गर्ने निर्णय गरे ।

ट्रयाकसुट खरिद गर्न रकम अपुग भएमा भएमा सम्पूर्ण कर्मचारीहरुले बर्षभरी खटिएबापत कल्याणकारी सेवा केन्द्रबाट प्राप्त प्रोत्साहन भत्ताबाट केही पैसा थप गर्ने सहमति समितिमा भएको थियो । तत्कालीन डीएसपी दलप्रसाद काफ्लेकै पालामा यो निर्णय भएको थियो । काफ्लेपछि गुल्मको कमाण्ड सम्हालेका डीएसपी गैरेले सो रकमबाट ट्रयाकसुट खरिद गरी बितरण गर्न पटक पटक रिपोर्ट गर्दा पनि आनाकानी गर्दैैआएका छन् ।

गैरेले पछिल्ला दिनमा त ट्रयाकसुट खरिदको बारेमा कुरा उठाउनेलाई हप्काउने, हुँदैन भनेर गालीगलौज गर्ने गरेको गुल्ममै कार्यरत सशस्त्र प्रहरीहरुले नेपालफेसलाई गुनासो पठाएका छन् । हाल आएर उक्त रकमले मेस बनाउने आदेश भएको छ । आईजीपी राजु अर्यालले ट्रयाकसुट खरिद गर्नुहुँदैन भनेका छन् भन्दै थर्काएका छन् । कोही बढी बाले डाँडा कटाउँछु, अब यो गुल्म महाबिद्यालय हुँदैछ । अबको कमाण्डर सधैं मै हुन्छु, महाविद्यालय मेरो हो भनेर थर्काउने गरेका छन् ।

संगीतकार गैरे संगीतका अब्बल होलान् तर उनको ज्ञान भएको संगीत बैन्ड टोलीमा एकछेउ पनि मिल्दैन । गैरेको संगीतको ज्ञान र बैन्ड गु्रपको ज्ञानको बिषय नै फरक छ । उनी सो गुल्ममा आएको करिब ३ महिना भयो । कुन बाजाको नाम के हो भन्ने नै थाहा हुन सकेको छैन । सिपाहीदेखि सबैले गाँस काटेर जम्मा गरेको रकमले गैरेले हाल आएर धमाधम मेस बनाउन सुरु गरेका छन् ।

सशस्त्र प्रहरी बलमा मेस बनाउन, भवन निर्माण गर्न सरकारले नै बजेट दिने गर्दछ । थोरै तलव पाउने सिपाहीको रगत, पसिना, मेहनतको कमाइबाट मेस बनाउने आदेश आईजीपी अर्यालले दिएका हुन् कि गैरेले नै आफ्नै तजबिजमा गरेका ह्न ? सशस्त्र प्रहरीलाई मेस बनाउने रकम राज्यले नदिएर सिपाहीको गाँस काटेर बनाउन लागिएको हो भन्ने प्रश्न उठेको छ ।

सिपाहीले गुल्ममा कार्यरत कर्मचारीहरुको खाँचो टार्नका लागि जम्मा गरेको रकममा डीएसपी गैरेको बक्रदृष्टि किन परेको होला ? बैन्ड गुल्मका सिपाहीहरुले पठाएको गुनासोपत्रमा प्रश्न गरेका छन्–‘हामीले हाम्रो गाँस काटेर रकम जम्मा गरी ट्रयाकसुट खरिद गर्नु अपराध हो आईजीपी साब ? डीएसपी गैरेले सिपाहीको गाँस काटेर जम्मा गरेको रकमबाट मेस बनाउने नाममा हिनामिना गर्न लागेका त होइनन् ?’

स्मरण रहोस्, ब्यान्ड गुल्मको कमाण्डर बनाइएका डीएसपी गैरे पूर्वआईजीपी शैलेन्द्र खनालका अति विश्वासपात्र भएर उनको पालामा चाकरी गरी लिनुसम्म लाभ लिनेमा पर्दछन् । खनाल आईजीपी हुँदा एकसे एक काबिल र क्षमतावान अधिकृत हुँदाहुँदै गैरेलाई १५ महिनाका लागि अमेरिका अध्ययनमा पठाएका थिए । खनाल र गैरे मामा फुपूका छोरा हुन् । गैरेलाई डीएसपीहरुको लागि आकर्षक मानिने काठमाडौंको गुल्मपति पनि खनालले बनाएका थिए । त्यो गुल्मको इन्चार्ज हुँदा गैरे रासन घोटालामा मुछिएपछि छानबिन कमिटी नै बनेको थियो ।

छानबिन टोलीले रासन घोटालामा उनको त्रुटि औंल्याएको प्रतिवेदन आइजीपी खनाललाई दिएको भए पनि भाइलाई कारबाही नगरी उन्मुक्ति दिएका थिए । उक्त प्रतिवेदन आफ्नै दराजमा थन्क्याएर तिनै गैरेलाई अमेरिकाको १५ महिनाको माष्टर डिग्री अध्ययनका लागि छनोट गरेका थिए ।

रासन घोटालामा परेका डीएसपी गैरेलाई अमेरिकामा अध्ययनका लागि छानेकोमा सशस्त्रमा नातावाद हावी भयो भनेर असन्तुष्टी प्रकट भएको थियो । खनालका आफन्त गैरेले उनको कार्यकालको अन्तिममा उनैबिरुद्ध अर्याललाई कुरा लगाएर नजिक भएका थिए । खनालका सबै कुरा लगाएबापत उनलाई अर्यालले बैन्ड गुल्मको इन्चार्ज बनाएका छन् । र, अब महाविद्यालय बनाएर उनैलाई हर्ताकर्ता बनाउन लागेको स्रोत बताउँछ ।