नयाँ नेतृत्व चयन गर्न माग गर्दै पेरिसडाँडामा अखिल क्रान्तिकारीका नेताको अनसन

काठमाडौं । नेकपा माओवादी केन्द्रको विद्यार्थी संगठन अखिल (क्रान्तिकारी) को नयाँ नेतृत्व चयन गर्न माग गर्दै ३ जना नेताले आज (मंगलबार) देखि आमरण अनसन शुरु गरेका छन् ।

माओवादी केन्द्रको केन्द्रीय कार्यालय पेरिसडाँडामा मंगलबार बिहान ११ बजेदेखि निवर्तमान केन्द्रीय उपाध्यक्ष तथा कार्यालय प्रमुख केशव रावल, निवर्तमान केन्द्रीय सदस्य खकेन्द्र रावल र निवर्तमान केन्द्रीय सदस्य तथा काठमाडौं जिल्ला उपाध्यक्ष जनक ढुंगानाले आजदेखि आमरण अनसन सुरु गरेका हुन् ।

रावल अखिल क्रान्तिकारी नेतृत्व चयन नगरी स्थगित भएको अखिल क्रान्तिकारीको बन्दसत्र यही मंसिर २३ गते नै सुरु गर्न र संगठनको नयाँ नेतृत्व चयनको लागि निर्वाचन सुनिश्चित गर्न माग गर्दै आमरण अनसन सुरु गरेको उनीहरुको भनाई छ ।

गएको असोज १० गतेदेखि काठमाडौँमा सुरु भएको अखिल क्रान्तिकारीको २३ औँ राष्ट्रिय सम्मेलन नयाँ नेतृत्व चयन नै नगरी स्थगित भएको थियो । संगठनमा रहने विद्यार्थी नेतामा उमेर हद लागू गर्ने कि नगर्ने भन्ने विषयमा देखिएको विवाद समाधान नभएपछि सम्मेलन स्थगित गरिएको थियो । त्यतिबेला विद्यार्थी नेताहरुबीच बन्दसत्र स्थलमै झडप र कुर्सी हानाहान भएको थियो । माओवादी केन्द्रको केन्द्रीय कार्यालयको बैठक पनि आज दिउँसो पेरिसडाँडामा बस्दैछ । पार्टी बैठक सुरु हुनुअघि नै विद्यार्थीहरुले नेताहरुलाई दबाब दिन आमरण अनसन सुरु गरेको हो ।