भगौडा डीएसपी कसरी भए प्रहरीको पीसीसी बैठकमा अतिथि ?

काठमाडौं । नेपाल प्रहरीको नीति बनाउने पोलिसी कोअर्डिनेसन कमिटी (पीसीसी) को बैठकमा एक गैरप्रहरीलाई सहभागी गराइएको छ । बिहीबार बसेको पीसीसी बैठकमा माओवादी द्वन्द्वकालमा प्रहरीको जागिर छाडेर विदेश पलायन भएका पूर्व प्रहरी नायब उपरीक्षक(डीएसपी) शिवजी श्रेष्ठलाई सहभागी गराइएको खुलेको छ ।

शिवजी श्रेष्ठले सामाजिक संजालमा आफू नेपाल प्रहरीको पीसीसी बैठकमा सहभागी भएको तस्वीर राखेका छन् । सामान्यतया पीसीसी बैठकको तस्वीर कहीँ कतै कसैले पनि सामाजिक संजालमा सेयर गर्दैनन् । तर श्रेष्ठले भने बिहीबारै उक्त तस्वीर सामाजिक संजालमा सार्वजनिक गरेका छन् ।

पूर्व भगौडा डीएसपी श्रेष्ठलाई पीसीसी बैठकमा सहभागी गराउने तारतम्य भने नेपाल प्रहरीका प्रवक्तासमेत रहेका डीआईजी दानबहादुर कार्कीले मिलाएको स्रोतले बताएको छ । शिवजी श्रेष्ठ द्वन्द्वकालमा रुकुममा डीएसपी हुँदा ५ जना गाई गोठालालाई माओवादी भनेर निर्मम हत्या गरेको आरोप लागेको थियो । द्वन्द्वकालमा प्रहरीको जागिरबाट भागेर उनी बेलायत पलायन भएका थिए । बेलायतमा पलायन भएका उनी हरेक बर्ष हुने गैरआवासीय नेपाल संघ(एनआरएनए)को कुम्भमेलामा भाग लिन आएको समयमा डीआईजी कार्कीको योजनामा पीसीसी बैठकमा सहभागी भएका थिए ।

प्रहरीको नीति बनाउने पीसीसी बैठकमा डीआईजीदेखि माथिल्लो पदका प्रहरी अधिकृतमात्र सहभागी हुन पाउँछन् । तर भगौडा डीएसपी श्रेष्ठलाई के आधारमा, कुन हैसियतमा पीसीसी बैठकमा सहभागी गराइयो भन्ने प्रश्न उठेको छ ।
डीआईजी दानबहादुर कार्कीलाई प्रहरीको ३० बर्षे सेवावधि छिटो हटाएर वर्तमान प्रहरी महानिरीक्षक बसन्तबहादुर कुँवरको अवकाशपछि नै आईजीपी हुने हतारो छ । जागिरबाट भागेका पूर्व डीएसपी श्रेष्ठले प्रहरीको ३० बर्षे सेवावधि हटाउन कानुन संशोधन गराइदिने आश्वासन दिएका छन् ।

ओखलढुंगा घर भएका श्रेष्ठले राज्य ब्यवस्था तथा सुशासन समितिका सभापति रामहरि खतिवडामार्फत् प्रभावमा पारी कानुन संशोधन गराइदिने ठेक्का लिएका छन् । कानुन संशोधन गरी ३० बर्षे सेवावधि हटाउने आश्वासन दिएकाले डीआईजी कार्कीले उनलाई प्रहरीको नीति बनाउने पीसीसी बैठकमा सहभागी गराएको स्रोत बताउँछ । सभापति खतिवडाले आफूले भनेको जे पनि मान्ने भन्दै उनले ३० बर्षे हटाउने ठेक्का नै लिएपछि डीआईजी कार्कीले पछिल्ला दिनमा उनको निकै खातिरदारी गर्न थालेका छन् । आईजीपी कुँवरसँग मर्निङवाक गराउनेदेखि बाक्लो भेटघाट मिलाउने गरिरहेका छन् । उनले डीआईजी दानबहादुर कार्कीकै समन्वयमा आफू पीसीसी बैठकमा भाग लिएको उल्लेखसमेत गरेका छन् ।

आईजीपी कुँवरसँग कपन गुम्बादेखि विभिन्न ठाउँमा वाकिङमा गएको तस्वीरसमेत शिवजी श्रेष्ठले सामाजिक संजालमा राखेका छन् । मुख्यसचिव एकनारायण अर्याल आफ्नो क्लासमेट भएकाले तुरुन्तै ३० बर्षे सेवाहद हटाउने आश्वासन उनले डीआईजी कार्कीलाई दिएका छन् ।

द्वन्द्वकालमा सयौं प्रहरीले ज्यान गुमाइरहँदा भागेर बेलायती नागरिक हुन पुगेका श्रेष्ठलाई पीसीसी बैठकमा सहभागी गराइएको बिषयलाई धेरै प्रहरीका उच्च अधिकारीले उचित ठानेका छैनन् । तर चेन अफ कमाण्डमा चल्ने प्रहरी संगठनमा आईजीपी बसन्तबहादुर कुँवरले नै भगौडालाई बैठकमा राखेकोमा प्रकटरुपमा बिरोध भने कसैले गर्न सकेका छैनन् । आईजीपी कुँवरले डीआईजी कार्कीको सल्लाहमा १५ बर्षअघि नै जागिर छाडेर पलायन भएका श्रेष्ठलाई पीसीसी बैठकमा राखेका थिए । भगौडा डीएसपीलाई पीसीसी बैठक राख्दा राम्रो सन्देश नजाने पाटोतर्फ आईजीपी कुँवरले विचार नगरेको प्रहरी स्रोत बताउँछ ।

त्यसो त सभापति खतिवडादेखि मुख्यसचिवको नाम लिने श्रेष्ठले लविङ गरेर अहिले छिट्टै ३० बर्ष हटाएर अहिलेका आईजीको एक बर्ष थप्दिने आश्वासन समेत दिने गरेकाले उनलाई पीसीसीको बैठकसम्म कुँवरले राखेको खुलेको छ ।
२०४९ चैतमा प्रहरी निरीक्षकमा जागीर खाएका श्रेष्ठ धिरजप्रताप सिंहका ब्याची हुन् ।