शैक्षिक योग्यता नै पेश नगरी सदस्य सचिव घिसिङको नियुक्ति, छानबिन गर्न माग गर्दै अख्तियारमा उजुरी

काठमाडौं । राष्ट्रिय खेलकुद परिषदका सदस्यसचिवका लागि स्नातक तह उत्तीर्ण योग्यता आवश्यक पर्छ । तर परिषदका वर्तमान सदस्य सचिव टंकलाल घिसिङलाई शैक्षिक योग्यताको प्रमाणपत्र पेश नै नगरी मन्त्रिपरिषदले २०७८ मंसिर १४ गते नियुक्ति गरेकाले छानबिन गर्न माग गर्दै अख्तियार दुरुपयोग अनुसन्धान आयोगमा उजुरी परेको छ ।

असार १९ गते अख्तियारमा दर्ता भएको उक्त उजुरीमा घिसिङको सक्कल प्रमाणपत्र झिकाएर छानबिन गर्न माग गरिएको छ । दर्ता नम्बर सी–०८४६२४ रहेको उजुरीमा उल्लेख छ–‘शैक्षिक योग्यताको प्रमाणपत्र पेश नगरी घिसिङलाई सदस्य सचिव पदमा नियुक्ति गरिएको हुँदा आवश्यक अनुसन्धान गरी उनको शैक्षिक योग्यताको सक्कलै प्रति झिकाइ आवश्यक कारबाही गरियोस् ।’

राष्ट्रिय खेलकुद परिषद ऐन–२०७७ को परिच्छेद ४ को नियम १७ को उपनियम २(ख) बमोजिम सदस्य सचिवको शैक्षिक योग्यतामा नेपाल सरकारबाट मान्यताप्राप्त विश्वविद्यालयबाट कम्तीमा स्नातक तह उपाधी प्राप्त गरेको हुनुपर्ने ब्यवस्था छ । तर घिसिङको नियुक्तिका क्रममा शैक्षिक योग्यताको प्रमाणपत्र नै पेश नगरिएको उजुरीमा उल्लेख छ ।

घिसिङले ब्यक्तिगत विवरणमा भने रत्नराज्य लक्ष्मी क्याम्पस प्रदर्शनीमार्ग काठमाडौंबाट स्नातक उत्तीर्ण गरेको उल्लेख गरेका छन् । ब्यक्तिगत विवरणमा स्नातक तह पास गरेको उल्लेख गरेका घिसिङले नियुक्ति गर्दा भने प्रमाणपत्र पेश नगरेकाले छानबिन गर्न माग गर्दै अख्तियारमा उजुरी परेको छ ।