दशौं राष्ट्रिय खेलकुद प्रतियोगिता चौथो पटक पनि स्थगित, औपचारिक घोषणा हुन बाँकी

काठमाडौं । दसौं राष्ट्रिय खेलकुद प्रतियोगिता पुनः स्थगित हुने भएको छ । औपचारिक रुपमा घोषणा नभए पनि प्रतियोगिता नहुने निश्चित भइसकेका छ ।

तीन बर्षअघि नै हुनुपर्ने दसौं राष्ट्रिय खेलकुद प्रतियोगिता राजनीतिक खिचातानीका कारण मिति तोक्दै स्थगित हुँदैआएको छ । यसअघि तीन पटकसम्म मिति तोक्दै स्थगित भएको प्रतियोगिता चौथो पटक पनि नहुने लगभग निश्चित भएको छ ।

गएको बर्ष २०८१ चैतमा सुर्खेतमा आयोजना हुनुपर्ने र सबै तयारी भइसकेको प्रतियोगिता तत्कालीन केपी ओली सरकारले अन्तिममा आएर तयारी नपुगेको भन्दै स्थगित गरेको थियो ।

राष्ट्रिय खेलकुद परिषद (राखेप)का सदस्य सचिव टंकलाल घिसिङ माओवादी(अहिलेको नेकपा) निकट भएकै आधारमा उनको कार्यकाल सकिएर नियुक्त हुने सदस्यसचिवको कार्यकालमा गर्ने सोचका कारण प्रतियोगिता स्थगित गरिएको थियो ।

तत्कालीन यु्वा तथा खेलकुद मन्त्री तेजुलाल चौधरीकै पालामा २ पटक प्रतियोगिता स्थगित गरिएको थियो । जेनजी सरकार गठनपछिका युवा तथा खेलकुद मन्त्री बब्लु गुप्ताले प्रतियोगिता २०८२ फागुन १ गतेदेखि ७ सम्म गर्ने भनेर मिति तोकेका थिए ।

गुप्ताकै अध्यक्षतामा बसेको राखेपको बैठकले प्रतियोगिताको मिति मात्र तोकेन, त्यसपछि बसेको बैठकले उपसमिति गठनदेखि प्रतियोगिता संचालनका लागि आवश्यक पर्ने कार्यबिधि, निर्देशिका पास गर्दै बजेटसमेत अर्थमन्त्रालयमा स्वीकृति पठाइएको थियो । अर्थ मन्त्रालयले दसौं राष्ट्रिय खेलकुद प्रतियोगिताको कार्यबिधि पास गर्दै बजेट समेत स्वीकृत गरिएको थियो ।

प्रतियोगिता संचालन र तयारीका लागि सुर्खेतमा सचिवालयसमेत उदघाटन भइसेको थियो । तत्कालीन मन्त्री गुप्ताको प्रस्तावमा मन्त्रिपरिषदको बैठकले फागुन पहिलो साता प्रतियोगिता आयोजना गर्ने प्रस्ताव अनुमोदन गरेको थियो ।

मन्त्रिपरिषद समेत संलग्न भएको उक्त प्रतियोगिता औपचारिक रुपमा स्थगित नगरी मौनरुपमा स्थगित गरिएको छ । मन्त्रिपरिषदसमेत संलग्न भएको उक्त प्रतियोगिता स्थगित गर्ने सम्बन्धमा युवा तथा खेलकुद मन्त्रालयले कुनै प्रक्रिया अगाडि बढाएको छैन । गुप्ताले मन्त्रीबाट राजीनामा दिएपछि खेलकुद मन्त्रालयको कार्यभार प्रधानमन्त्री सुशीला कार्की आफैंले सम्हाल्दैआएकी छन् ।

प्रधानमन्त्रीसमेत प्रतियोगिता स्थगित भएकोबारेमा अनभिज्ञ जस्तै देखिएकी छन् । तीन पटकसम्म स्थगित भइसकेको दसौं राष्ट्रिय खेलकुद प्रतियोगिताको तयारीकै क्रममा राज्यको करोडौं खर्च भइसकेको छ । खेलाडी उत्पादनका लागि संघहरुले अनावश्यक रुपमा आर्थिक ब्ययभार ब्यहोर्न पनि बाध्य छन् ।

बर्षौंदेखि एउटा पनि राष्ट्रिय प्रतियोगिता सम्पन्न गर्न नसक्ने युवा तथा खेलकुद मन्त्रालय, राखेपको कुनै औचित्य नरहेको खेलाडीहरु बताउँछन् ।