नेप्से आज २६.८१ अंकले घटेर १९७९ विन्दुमा

काठमाडौं । आज साताको पहिलो करोबार दिन आइतबार धितोपत्र दोस्रो बजार मापक नेप्से परिसूचक २६.८१ अंकले घटेर बन्द भएको छ । यसदिन नेप्से १.३३ प्रतिशतले घटेर १९७९.०२ विन्दुमा बन्द भएको हो ।

यस दिन तीन अर्ब आठ करोड ६९ लाख रुपैयाँको धितोपत्र खरिद–बिक्री भयो । कारोबारमा आएका मध्ये ३८ कम्पनीको सेयर मूल्य बढ्यो । २०६ कम्पनीको सेयर मूल्य घट्यो । चार कम्पनीको सेयर मूल्य स्थिर छ ।

१३ मध्ये उत्पादन तथा प्रशोधन र फाइनान्स समूहको परिसूचक वृद्धि भएको छ । फाइनान्स समूहको परिसूचक १.४ प्रतिशत र उत्पादन तथा प्रशोधन समूहको परिसूचक ०.८० प्रतिशतले वृद्धि भएको छ ।

सर्वाधिक परिसूचक घट्नेमा हाइड्रोपावर समूह छ । यो समूहको परिसूचक २.४२ प्रतिशतले घटेको नेपाल स्टक एक्सचेन्जले जनाएको छ ।

समाज लघुवित्त वित्तीय संस्थाको सेयर मूल्य आज पनि १० प्रतिशतले नै बढेको छ । यो कम्पनीको सेयर मूल्य प्रत्येक दिन १० प्रतिशतले वृद्धि हुँदै आएको छ ।